Umurenge wa Jarama wegukanye igikombe cy’Umurenge Kagame Cup 2025 ku nshuro ya 2 mu Karere ka Ngoma nyuma yo gutsinda uwa Mugesera ibitego 3-1 mu bagabo, mu bagore uwa Rukumberi wanyangiye uwa Mutenderi ibitego 6-0.
Iyi mikino ya nyuma yabereye kuri sitade ya Ngoma kuri uyu wa Gatandatu, tariki 01 Gashyantare 2025 nyuma yo kwizihiza Umunsi mukuru w’Intwari z’Igihugu.
Iyi mikino yakinwe n’amakipe y’imirenge yahize indi mu cyiciro cy’abagore n’abagabo.
Ku ikubitiro, umukino ubanza wahuje abagore bo mu Murenge wa Mutenderi na Rukumberi warangiye ikipe y’Umurenge wa Rukumberi yegukanye igikombe ku rwego rw’Akarere ka Ngoma nyuma yo gutsinda ibitego 6-0.
Umukino wakurikiwe n’uw’abagabo aho sitade yari yuzuye abafana benshi bavuye mu mirenge bakaza gushyigikira amakipe yabo ariyo Jarama na Mugesera zakinaga finale.
Umukino utari woroshye waje kurangira ikipe y’Umurenge wa Jarama itsinze Mugesera ibitego 3-1.
Umurenge wa Jarama wegukanye igikombe cy’Umurenge Kagame Cup 2025 mu Karere ka Ngoma ku nshuro ya kabiri aho mu mwaka wa 2024 naho yacyegukanye nyuma yo gutsinda uwa Sake ibitego 5-0 mu bagabo ukaza kuviramo ku rwego rw’Intara n’Umujyi wa Kigali.
Amakipe yabaye aya mbere yahawe ibihumbi 200Frw, igikombe, umupira wo gukina n’icyemezo cy’ishimwe.
Amakipe yabaye aya kabiri yahembwe ibihumbi 50, n’umupira wo gukina n’icyemezo cy’ishimwe.
Aya marushanwa ahuza imirenge yose mu Gihugu, ikabera muri buri karere, amakipe yahize andi mu majonjora agakomeza ku rwego rw’Intara n’Umujyi wa Kigali, ayarushije andi muri buri mukino agahurira mu marushanwa asoza ku rwego rw’Igihugu.
