Kimwe n’ahandi mu Gihugu, mu Karere ka Ngoma hizihijwe umunsi w’Umuganura ku nshuro ya 25 ku nsanganyamatsiko igira iti “Umuganura, isoko y’ubumwe n’ishingiro ryo kwigira” mu birori byari bibereye ijisho byarimo kuzirikana umurage w’abakurambere, gusabana n’ibindi.
Ni birori byabereye mu Murenge wa Kazo ku rwego rw’Akarere ka Ngoma bikitabirwa n’abarimo Guverineri w’Intara y’Iburasiraziba, Rubingisa Pudence, Ubuyobozi bw’Akarere n’Inzego z’Umutekano; n’abaturage.
Umuganura ni inkingi ikomeye mu mibereho y’Abanyarwanda kuva mu myaka ya kera cyane kugeza ubu, kuko akamaro n’agaciro byawo byatumye abasokuruza bacu bagenda bawuhererekanya ukaba ukizihizwa ubu.
Indangagaciro remezo umuganura ubumbatiye ni ubumwe, umurimo no gukunda Igihugu.
Ibi birori byaranzwe no kuganura(kunywa cyangwa kurya ku musaruro bwa mbere),kuganuza(gufata umusaruro wa mbere ukawusangiza abandi), kugabira umuryango inka, guha abana amata, imbyino zitandukanye.
Mu bindi harimo kwishimira umusaruro wabonetse, gusuzuma ibitaragezweho, impamvu zabiteye no gufata ingamba. Hatanzwe ikiganiro ku mavu n’amavuko y’Umuganura, umugeni wari ufite ubukwe bamuhetse mu ingobyi nka kimwe mu byabaga bigize ubukwe bw’Abanyarwanda bo hambere.
Amwe mu mafoto twatoranyijwe agaragaza iyizihizwa ry’Umuganura mu Karere ka Ngoma.
