Ngoma : Amashanyarazi  arashyirwa mu majwi mu guteza inkongi i Kibungo

Insinga z’amashanyarazi zidateranyije neza ni zo zivugwaho  kuba  imbarutso y’inkongi  y’umuriro yakongoye iduka ry’ibikoresho by’ubwubatsi mu Mujyi wa Ngoma.

Ni inkongi y’umuriro  yatangiye  ahagana saa 14:40 z’amanywa tariki ya 10 Gashyantare 2020, mu iduka ricururizwamo  ibikoresho   by’ubwubatsi  ry’umucuruzi witwa Habimana Léonidas uzwi ku izina rya ‘Dorisi’ i Kibungo.

Ibikoresho byarimo nk’amatiyo, amarangi, imbaho, sima,  n’ibindi byinshi byahiye birakongoka, bike   abaturage  bahuriye batabaye babashije kurokora ni ibyari imbere y’umuryango.

Amakuru yizewe muhaziyacu.rw  ifite ni uko iyo nkongi y’umuriro yaduka, nyir’iri duka yari yicaye hanze aganira na bagenzi be, agatungirwa agatoki yerekwa umwotsi uva mu iduka rye, ari na bwo abantu batangiraga kuza kureba ikibaye.

Habimana Léonidas  warebye iduka rye rikongoka, yagerageje kwinjira mu mwotsi mwinshi wasohokaga mu muryango uramuzibiranya, ariko no kubyakira biramunanira afatwa n’ihungabana ku buryo yahise ajyanwa mu bitaro bikuru bya Kibungo.

Amashanyarazi  ni yo ashyirwa mu majwi

Ubuhamya bw’abakorera ubucuruzi mu Mujyi wa Ngoma muhaziyacu.rw  yavuganye na bo  ku iby’iyi nkongi, burahuriza ku kugaragaza ko icyo bakeka ari  insinga z’amashanyarazi.

Uwitwa Ndabamenye  yagize ati: “Mu by’ukuri iyi nkongi twayibonye mbere kuko urabona ko dukorera ahatari kure y’iri duka, ariko icyayiteye nka 90% ni ibibazo bya ‘installation’ y’amashanyarazi, kuko bisa n’ibyatangiye biturika.”

Uwizeyimana Dieudonne na we ati: “Kubera ko  bari bari gusudiraho ibyuma, muri gahunda yo kuvugurura umujyi kandi guteranya biriya byuma bikaba bisaba umuriro mwinshi, ushobora kuba warenze ubushobozi bw’insinga zo mu iduka zigashya, kuko inkongi ntiyatewe na  buji cyangwa umuntu wanywaga itabi.”

Undi mutangabuhamya wari uhari inkongi igitangira ati: “Byatangiye biturika nk’aho ari amashanyarazi,  kumwe insinga zikoranaho, amahirwe ni uko nta muntu wari mu iduka mo imbere.”

Abaturage batabaje Polisi

Inkongi y’umuriro igifata iduka rya ‘Dorisi’  abaturage bihutiye  gutabaza Polisi y’u Rwanda, ku buryo  agahana saa 15:20  Abapolisi bari bamaze kuhagera, hategerejwe ubufasha  bwo kuzimya umuriro  hakoreshejwe imodoka yabigenewe ya Polisi.

Ahagana i saa kumi , Imodoka ya Polisi izimya inkongi yari igeze i Kibungo, ivuye mu Karere ka Rwamagana  ahari ikicaro ya Polisi  y’u Rwanda mu Ntara y’Iburasirazuba, maze  itangira byimbitse ibikorwa byo kuzimya, byakomeje kugeza   hafi saa mbili z’umugoroba.

Impungenge zari zose, ku bacururiza mu miryango yindi itatu, iri ku nzu y’imiryango ine irimo umwe wafashwe n’inkongi, ku buryo  bose ibicuruzwa barwanye no kwihutira kubikuramo ngo hato na byo bitagerwaho n’iyo nkongi.

Mu kiganiro na muhayacu.rw, CIP Hamdun Twizeyimana  Umuvugizi wa Polisi mu Ntara y’Iburasirazuba  washimye uburyo abaturage b’i Kibungo bihutiye kugeza amakuru kuri Polisi, yatangaje hatangijwe iperereza ku mpamvu yakomotseho inkongi yakongoye iduka (Quincaillerie)  rya Habimana Léonidas  uzwi nka ‘Dorisi’ i Kibungo.

Ati: “Kugeza ubu impamvu yateye inkongi ntabwo iramenyekana, ni ugukomeza gukora iperereza ngo turebe ko twamenya  icyabiteye,  kuko rigirwamo uruhare n’inzego nyinshi … ariko turarikora vuba.”

CIP Twizeyimana  yakomeje agira ati: “Tukibimenya, Polisi yihutiye kugerayo no kuzimya umuriro kandi intego yagezweho kuko nta rindi duka umuriro wafashe ngo wangize.”

Naho ku kuba   hari abashyira mu majwi ‘insinga z’amashanyarazi’ kuba impamvu y’iyi nkongi, avuga ko  nka Polisi  badashobora  gushingira ku makuru y’abo bantu gusa,  kandi ngo na nyir’iduka ushobora kurusha aba bandi amakuru  ‘yahise ahungabana  akajyanwa mu bitaro’.

Polisi igagagaza kandi ko agaciro k’ibyangirikiye muri iryo duka, kugeza ubwo twatunganyaga iyi nkuru katari kazwi, gusa ikemeza ko bigaragara ko (Dorisi) yari ‘Umucuruzi ukomeye, ku buryo hashobora kuba hari harimo umutungo munini’;  icyakora ngo niba  yari afite ubwishingizi, nyuma yo kubigaragaza  ashobora kuzishyurwa.

Mu rwego rwo gukumira no kurwanya inkongi, Polisi y’u Rwanda igira abantu bose inama zirimo  gutunga ibikoresho byafasha mu kuzima umuriro ugitangira  nka kizimyamwoto n’umucanga wumutse.