Abayobozi b’amakoperative mu Karere ka Ngoma basabwe kunoza imiyoborere no gushyira imbere inyungu n’imibereho y’abanyamuryango, kuko amakoperative ari imwe mu nzira Igihugu cyifashisha mu kwihutisha iterambere ry’Abanyarwanda.
Ibi byagarutsweho mu nama nyunguranabitekerezo ku iyubahirizwa ry’amategeko agenga amakoperative n’imiyoborere yayo, yabaye kuri uyu wa 01 Nzeri 2026, aho ubuyobozi bw’Akarere ka Ngoma bwafatanyije n’abahagarariye Urugaga rw’Amakoperative mu Rwanda ndetse n’abandi bafatanyabikorwa mu kuganira n’abayobozi b’amakoperative.
Muri iyi nama, hibanzwe ku buryo amakoperative yakongerwamo imbaraga, kunoza imikorere yayo no guharanira ko umutungo wayo ukoreshwa mu nyungu z’abanyamuryango.
Perezida w’Urugaga rw’Amakoperative mu Rwanda, NCCR, Nyirabahinyuza Mediatrice, yasabye abayobozi b’amakoperative kuba abayobozi bashakira iterambere abo bashinzwe, aho gushyira imbere inyungu zabo bwite.
Yagize ati: “Umuyobozi dukeneye ni uyobora neza abanyamuryango abashakira iterambere, ni uwita ku mibereho myiza yabo, urwego buri wese ahagazemo, ahagarariye inyungu z’abanyamuryango, ntabwo ukwiye kuba umuyobozi witeza imbere abandi bagasigara, koperative ni inzira yizewe yo kwihutisha iterambere no kuzamura imyumvire y’abanyamuryango.”
Yanashimangiye ko umuyobozi wa koperative adakwiye gukoresha umwanya afite mu guteza imbere ubuzima bwe bwite mu gihe abanyamuryango ayobora bakiri mu bibazo, ahubwo ko inshingano ye ya mbere ari ugushakira abanyamuryango ibisubizo no guteza imbere koperative.
Umuyobozi w’Akarere ka Ngoma wungirije ushinzwe iterambere ry’ubukungu, Mapambano Nyiridandi Cyriaque, yavuze ko gukorera hamwe binyuze mu makoperative ari amahirwe akomeye yo kwihutisha iterambere.
Yagize ati: “Koperative ni imwe mu nzira Igihugu cyafashe yo guteza Abanyarwanda imbere ariko bibumbiye hamwe, ni yo nzira yafashwe dushimira umukuru w’Igihugu wabihaye umurongo. Umutwe umwe wigira inama yo gusara, ariko iyo mushyize hamwe havamo ikintu gikomeye. Abayobozi dufite inshingano zikomeye zo gutekereza ngo aho nasanze ibintu ubu mbigejeje he? Nk’umuyobozi mwiza ukwiye kuba ugira icyo uzamuraho kuruta uko wabisanze, mwite cyane ku gushaka iterambere ry’abo uyoboye.”
Bamwe mu bayobozi b’amakoperative baganiriye na MUHAZIYACU bavuze ko bahungukiye ubumenyi bwabafasha kunoza imikorere no gushyira imbere abanyamuryango.
Ntambara Elie, uyobora koperative ikora ubucukuzi bw’amabuye y’agaciro, yagize ati: “Abayobozi batweretse ko koperative ari ikintu gikomeye kandi ifatiye runini abaturage b’u Rwanda harimo kubateza imbere kandi ibyo ntabwo byagerwaho ifite imikorere mibi, niyo mpamvu badusabye kugira ibyo dukosora mu kuyobora, twirinda kwikunda ahubwo dukunda abanyamuryango. Ntabwo wakubaka Hoteli kandi ufite umunyamuryango inzu iri kugwaho. Ugomba kubanza ugakemura ikibazo cy’umunyamuryango no kubazamura.”
Umurisa Janvière, ukorera muri Koperative KOARICA ikorera ubuhinzi bw’umuceri mu Murenge wa Kazo, yavuze ko iyi nama yabongereye ubumenyi ku mategeko n’imiyoborere y’amakoperative.
Ati: “Iyi nama irushijeho kuduhugura, abayobozi batwunguye ubumenyi ku birebana n’umuhinzi by’umwihariko itegeko rimurengera, inama batugiriye batweretse ko imiyoborere mibi ituma koperative itabasha gutera imbere, batwereka ko dukwiye kwita kubo tuyobora no kubazamura mu mibereho yabo.”
Mu Karere ka Ngoma habarurwa amakoperative agera kuri 180, akorera mu bikorwa bitandukanye by’ubukungu.
