Abagore bo mu Karere ka Ngoma biyemeje kongera uruhare rwabo mu gukumira no gukemura amakimbirane yo mu miryango, ndetse no guteza imbere umuryango ushoboye kandi utekanye.
Ibi byagarutsweho kuri uyu wa Kabiri tariki 25 Kanama 2026, ubwo Umuyobozi w’Akarere ka Ngoma, Niyonagira Nathalie, yitabiraga inteko rusange y’Abagore yabereye mu cyumba cy’inama cy’Akarere ka Ngoma. Ni igikorwa cyitabiriwe n’inzego z’umutekano ndetse n’abafatanyabikorwa b’Akarere. Cyari gifite insanganyamatsiko igira iti: “Uruhare rw’umugore mu rugamba rwo kubaka umuryango ushoboye kandi utekanye.”
Muri iyi nteko rusange kandi habaye umuhango wo gusinyana imihigo ya Mutimawurugo y’umwaka wa 2026-2027 hagati y’Umuyobozi w’Akarere ka Ngoma, Niyonagira Nathalie, n’Umuhuzabikorwa w’Inama y’Igihugu y’Abagore.
Mu byaganiriweho muri iyi nama hanaganiriwe ku kibazo cy’amakimbirane mu muryango n’uburyo akwiye gukemurwamo aho bamwe mu baganiriye na MUHAZIYACU bavuze ko bagiye kongera ubukangurambaga mu kwigisha abagize imiryango kurwanya amakimbirane.
Nyiraminani Marie Grace wo mu Murenge wa Sake, ati: “Igitera amakimbirane usanga ari abantu batajya mu nama, batitabira ibiganiro, ariko iyo tubimenye tubagira inama kandi usanga bikemuka bakabana amahoro. Ubu icyo tugiye gukora ni ukujya mu cyaro iwacu tukaganiriza iyo miryango harebwa uko nayo yava mu makimbirane.”
Mukadusabe Joseline wo mu Murenge wa Gashanda yavuze ko kugabanya ikoreshwa ry’inzoga zitujuje ubuziranenge na byo byagize uruhare mu kugabanya amakimbirane amwe mu miryango.
Yagize ati: “Kuva aho Leta imaze iciye izi nzoga zitujuje ubuziranenge usanga amakimbirane asa naho yagiye agabanuka, kuko mbere wasangaga umugore yirirwa mu kabari yataha akarwana n’umugabo we cyangwa se umugabo agataha arwana, ariko usanga ubu byaragabanutse, binyuze mu nyigisho zacu twizeye ko bizagabanuka burundu.”
Umuyobozi w’Akarere ka Ngoma, Niyonagira Nathalie, yavuze ko ikibazo cy’amakimbirane mu miryango kigikeneye ubukangurambaga buhoraho. Yagaragaje ko ubuyobozi bukwiye gukomeza kwegera imiryango ifite ibibazo, kumenya impamvu z’amakimbirane no gushaka ibisubizo bifatika.
Yagize ati: “Hari ikintu gikomeye cy’amakimbirane mu miryango dukwiye kongera ubukangurambaga mu kwigisha iyo miryango, hari ibiterane bijya biba, ubushize igera kuri 200 yavuye mu makimbirane, iyo rero turasaba ngo dukurikirane turebe ko itazasubiramo, n’iyo kandi itarayavamo tumanuke turebe ibitera amakimbirane dushake uko byavaho.”
Ubuyobozi bw’Akarere ka Ngoma buvuga ko muri aka Karere habaruwe imiryango igera kuri 700 ibana mu makimbirane.
