Umurenge wa Muhura, umwe muri 14 igize Akarere ka Gatsibo, wihariye ku guhinga kawa, aho beza toni 3,903, bakavanamo asaga miliyari 1.6 Frw ku gihembwe kimwe.
Uyu murenge uri mu Majyepfo y’Uburengerazuba bw’Akarere ka Gatsibo, uteyemo ibiti 4,501,190 bya kawa, bihinze kuri hegitari igihumbi na 800, kikaba ari na cyo gihingwa kihiganje cyane kandi gihindura ubuzima bw’abaturage kurusha ibindi.
Ibindi bihingwa bihinze ku buso buto ugereranyije na kawa, dore ko ibigori biri kuri hegitari zirenga 600, ibishyimbo bikaba ku zirenga 500. Muri iki gice ibigori bihingwa mu mibande, imisozi itatseho kawa, dore ko irusha ubwinshi amashyamba ahateye.
Iki gihingwa ubundi cyera rimwe mu mwaka, kivamo toni 3,903.5 iyo kitaratunganywa, mu gihe kawa yatunganyijwe ikagera kuri toni 780.7, yose iva muri uyu murenge, ahanini ugizwe n’imisozi.
Muri ubu buhinzi havamo amafaranga atubutse, dore ko mu gihembwe kimwe rukumbi kawa yeramo mu mwaka, abahinzi bakuramo amafaranga agera kuri miliyari 1.6 Frw.
Ku mikoranire n’abafatanyabikorwa barimo kompanyi za RTC, EMPEXCOR, COFFEE VILLAGE na RWACOF zifite inganda zitonora kawa, Umurenge wa Muhura ufite ahatunganyirizwa kawa harindwi (coffee washing stations). Iyo izi kompanyi zimaze gutunganya kawa, ziyigemura ku zindi sosiyete ziyicuruza, kugera no ku rwego mpuzamahanga.
Umunyamabanga Nshingwabikorwa w’Umurenge wa Muhura, Ndayisenga Jean Claude yabwiye MUHAZIYACU ko ibanga uyu murenge ukoresha mu kugira kawa nyinshi kandi ibyara umusaruro ari kuyitaho no gushyiraho intego yo kongera ibiti byayo biterwa buri mwaka, bajyanamo n’abafatanyabikorwa bawo.
Yagize ati: “Kawa ni igihingwa kimaze imyaka myinshi muri uyu murenge, noneho, uko abo bafatanyabikorwa babonetse bagenda bagura ubuso kawa ihinzeho. Buri mwaka hagomba kugira ingemwe za kawa ziterwa kugira ngo hongerwa ubuso iteyeho, aho bitewe n’intego buri hantu hatunganyirizwa kawa hafite mu gutera kawa, byibura tudashobora kujya munsi y’ingemwe ibihumbi 100.
Umurenge wa Muhura utuwe n’abantu 33,325, uri ku buso bwa kilometero kare 55.74, mu gihe hegitari 1800.4 zose zihinzeho kawa nk’igihingwa kihariye muri iki gice cy’Akarere ka Gatsibo.
