Minisiteri y’ubuzima yatangaje ko umuntu wa kabiri yishwe n’icyorezo cya Koronavirusi-Covid19 kuri uyu wa kabiri tariki 2 Kamena 2020.
Mu itangazo rigaragaraza amakuru mashya kuri Koronavirusi iyi minisiteri ishyira ahagaragara buri munsi hagaragaramo ko ku itariki ya 2 Kamena, mu Rwanda abanduye Covid-19 ari abantu 384 barimo barindwi bashya, abakirwaye ari 113, mu gihe abantu babiri bamaze kwicwa na yo barimo umwe wapfuye uwo munsi.
Ubusobanuro bugufi bwaherekeje iri tangazo buvuga kuri uyu muntu wishwe na Koronavirusi bugira buti: “Umurwayi witabye Imana yari umupolisikazi w’imyaka 24 wari mu butumwa bw’akazi mu mahanga aho yanduriye Koronavirusi aza kugarurwa mu Rwanda amaze kuremba. Yahise yitabwaho n’abaganga ariko yaje kwitaba Imana azize uburwayi bukomeye.”
Ku itariki ya 30 Gicurasi ni bwo mu Rwanda hatangajwe ko umuntu wa mbere yishwe na koronavirusi
Inzego z’ubuvuzi zikomeje kwita ku barwaye Covid-19, ku buryo mu Rwanda mu bantu 384 bari bamaze kuyandura kugeza ku itariki ya 2 Kamena 2020, abari bamaze kuvurwa no gukira ari 269 barimo barindwi bakize kuri iyo tariki.
Abaturarwanda basabwa kwirinda Covid-19 bita cyane ku gukaraba intoki kenshi kandi neza n’amazi meza n’isabune cyangwa kuzisukuza imiti yabugenewe, guhana intera nibura ya metero, kwirinda ingendo zitari ngombwa no kwambara agapfukamunwa n’amazuru mu gihe hari ugiye ahari andi bantu.
