Minisitiri w’abakozi ba leta n’umurimo Prof. Bayisenge Jeannette yagaragaje akababaro ka bamwe mu bari abakozi ba leta bakoreraga mu bice byahindutse Intara y’ Iburasirazuba bishwe muri Jenoside yakorewe abatutsi mu 1994 bakicwa na leta bakoreraga; yihanganisha abo mu miryango yabo.
Kuri uyu wa 21 Mata ku biro by’Intara y’Iburasirazuba habereye igikorwa cyo kwibuka ku nshuro ya 30 Jenoside yakorewe abatutsi 1994, abari abakozi 19 bishwe muri Jenoside yakorewe abatutsi bakoreraga Perefegitura ya Kibungo na za Superefegitura za Rusumo, Rwamagana, Kanazi na Ngarama zahujwe zikaba Intara y’Iburasirazuba; n’abari abakozi 25 b’Amakomine yahujwe akaba Akarere ka Rwamagana bishwe muri Jenoside yakorewe Abatutsi mu 1994.
Mu ijambo rye Minisitiri Prof. Bayisenge yagarutse ku gisebo cya leta yateguye Jenoside ikanayishyira mu bikorwa aho yageze no kwica abari abakozi bayo bakoreraga igihugu, hakirengagizwa uwo musanzu ukomeye batangaga ku kubaka igihugu ahubwo bagahitamo kubica muri Jenoside babaziza uko bavutse, aho bavukijwe amahirwe yo kubaho no gukomeza gukorera igihugu.
Minisitiri Prof. Bayisenge yihanganishije imiryango ifite ababo bari abakozi ba Leta bishwe muri Jenoside yakorewe Abatutsi, anenga abari abakozi ba leta bagize uruhare mu kwica no kugambanira bagenzi babo bakoranaga muri leta, bakirengagiza igihango bari bafitanye cyo gukorera leta hagamijwe ko u Rwanda rutera imbere, ahubwo bo bakimakaza amacakubiri n’urwango rw’abatutsi rwabaganishije kuri Jenoside yakorewe abatutsi mu 1994.
Ikindi cyagarutsweho ni irondakoko, n’irondakarere mu mirimo mu kwiga no gusaba cyangwa se guhabwa akazi.
Minisitiri Prof. Bayisenge yakomeje agira ati: “Kwibuka aba bari abakozi ba leta ni ukurushaho kubaha agaciro tuzirikana uruhare bagize mu iterambere ry’igihugu”.
Uhagarariye imiryango y’abari abakozi ba leta mu byahujwe bikaba Intara y’Iburasirazuba ndetse n’Akarere ka Rwamagana Bucyeye Ignacienne yashimye uruhare rwa leta mu kubafasha kwiyubaka ndetse kugeza ubu bakaba bakomeye.
Guverineri w’Intara y’Iburasirazuba yasabye buri wese waba afite amakuru ku bari bakozi bazize Jenoside yakorewe abatutsi kuyagaragaza kugira ngo bamenyekane kandi bajye bazirikanwa mu Kwibuka.
Intara y’Iburasirazuba igize n’iyari Perefegitura ya Kibungo yari ifite Su Perefegitura ya Rwamagana n’iya Rusumo ikaba yari ifite amakome 11 arimo Rutonde, Muhazi, Kabarondo, Kayonza, Birenga, Kigarama, Mugesera, Sake, Rukira, Rusumo, Rukara.
Ku gice cya Kigali Ngali hari Komini Bicumbi na Gikoro zabyaye Akarere ka Rwamagana na Komini Gashora, Kanzenze na Ngenda ziri ku gice cya Bugesera hari Superefegitura ya Kanazi, naho ku gice cya Byumba hari ibice bya Komine Kiyombe biri mu Karere ka Nyagatare hakaba Muhura na Ngarama biri ubu mu Karere ka Gatsibo.
