Minisitiri w’Abakozi ba Leta n’Umurimo, Amb.Nkulikiyinka Christine yasabye ababyeyi bo mu Karere ka Ngoma kugira uruhare runini muri gahunda yo kwita ku bana n’urubyiruko mu biruhuko babashishikariza kuyitabira, kuko bazahungukira byinshi, indangagaciro zikwiriye Umunyarwanda no gukuza impano zabo.
Ibi yabigarutseho ubwo yifatanyaga n’Akarere ka Ngoma mu Murenge wa Zaza ahatangirijwe gahunda yo kwita ku bana n’urubyiruko mu biruhuko bisoza umwaka w’amashuri wa 2024-2025 ku rwego rw’Akarere ku ya 23 Nyakanga 2025.
Abana n’urubyiruko 12,670 ni bo bari gutorezwa kuri site z’icyitegerezo 14 zo mu Karere ka Ngoma.
Minisitiri w’Abakozi ba Leta n’Umurimo, Nkulikiyinka Christine yavuze ko kuba Igihugu gifite umubare munini w’urubyiriko bafite inshingano zo kubitaho nk’imbaraga z’Igihugu.
Yagize ati “Abana n’urubyiruko bari munsi y’imyaka 30 ni 67% by’Abanyarwanda bose, kuba rero dufite umubare munini w’abakiri bato biduha umukoro ukomeye wo kubitaho kugira ngo tubategure neza, tubaha ubumenyi bukenewe ngo babe Abanyarwanda buzuye.”
Minisitiri Amb.Nkulikiyinka yagaragaje ko iyi gahunda ari umwanya mwiza wo kubitaho babigisha indangagaciro nyazo zikwiriye Umunyarwanda wifuzwa, kubigisha amasomo y’ubuzima bwiza, gukuza impano, kugira isuku, kwirinda ingeso mbi harimo kunywa ibiyobyabwenge, ubuzererezi, ubusambanyi n’ibindi.
Minisitiri Nkulikiyinka akomeza agira ati: “Iyi gahunda kandi ni umwanya mwiza wo kwigisha abana amasomo azabafasha mu buzima bwabo bwose, kurangwa no gukora neza, kunoza umurimo, kwita ku isuku, kwidagadura ariko byose bikura no gukuza impano.”
Yavuze ko kandi ko igamije gufasha abana n’urubyiruko gukunda ishuri, kungurana ubumenyi binyuze mu biganiro bitandukanye, bikabafasha kuvumbura no gukuza impano bifitemo binyuze mu mikino no kumenya guhanga umurimo.
Ati: “Sinshidikanya rero ko igihe cyo gutangira amashuri nigitangira buri mwana wese uzaba warageze hano azaba afite ikintu gishya yungutse.”
Minisitiri Nkulikiyinka yaboneyeho gusaba ababyeyi gushyigikira iyi gahunda.
Yagize ati: “Ndabasaba ko mwagira uruhare runini kugira ngo iyi gahunda izagende neza, abana banyu mubashishikarize kuza kandi n’abandi babyeyi mwaba muzi batabishyizemo imbaraga mubashishikarize kohereza abana babo kuko bazahavana byinshi.”
Abayobozi kuva ku rwego rw’Isibo kugeza ku Karere basabwe gufasha imiryango kumva neza ibyiza by’iyi gahunda kugira ngo yitabirwe.
Minisitiri Nkulikiyinka yasoje avuga ko ubufatanye bw’inzego zitandukanye aribwo buzatuma ubuzima bw’abana n’urubyiruko biga n’abatiga burushaho kubungabungwa muri ibi bihe by’ibiruhuko.
Iyi gahunda yo kwita ku rubyiruko mu biruhuko izasozwa kuwa 29/08/2025. Ibikorwa biri kubera ku rwego rw’Akagari ariko utugari twegeranye dushobora gutoreza kuri site imwe. Iyi gahunda izajya iba iminsi itatu(3) mu cyumweru.
