Mu rwego rwo kurinda ubuzima bw’abaturage no gukomeza guhangana n’ibiyobyabwenge, ubuyobozi bw’Akarere ka Nyagatare bwamennye litiro 7,000 z’inzoga zitujuje ubuziranenge nyuma yo gusanga zakorewe ndetse zikabikwa mu bikoresho bya pulasitiki bitemewe n’Ikigo cy’Igihugu gishinzwe ubuziranenge bw’Imiti n’Ibiribwa-Rwanda FDA.
Izi nzoga zari zifite agaciro k’arenga 6,000,000Frw zikaba zarakorwaga n’uruganda rwitwa Mwurire M&M Business Company ruherereye mu Murenge wa Musheri, Akagari ka Nkoma, Umudugudu wa Rukundo.
Raporo y’Ikigo Rwanda FDA yakozwe nyuma y’ubugenzuzi bwakorewe inganda zitunganya ibinyobwa yagaragaje ko uru ruganda rwakoraga inzoga mu buryo butujuje ibisabwa, aho rwazibikaga mu bigunguru bya pulasitike kandi bitemewe kubikwamo cyangwa gutarwamo ibinyobwa.
Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Juliet, yavuze ko ubuyobozi butazihanganira abantu bakora cyangwa bacuruza ibintu bishobora gushyira ubuzima bw’abaturage mu kaga.
Yagize ati: “Turakangurira abaturage kwirinda ibiyobyabwenge n’inzoga zitujuje ubuziranenge kuko bigira ingaruka mbi ku buzima no ku mutekano w’imiryango. Abakora ibikorwa binyuranyije n’amategeko bazajya bakurikiranwa babihamirwe n’amategeko.”
Yakomeje asaba abaturage kujya bagira amakenga ku binyobwa banywa no gutanga amakuru ku bantu bakora ibikorwa binyuranyije n’amategeko, ati: “Turasaba abaturage kudakoresha ibi binyobwa kuko bishobora kubangiriza ubuzima. N’uwumva atameze neza kandi yarakundaga kubinywa yakwegera abaganga bakamufasha kureba niba nta ngaruka byamugizeho.”
Hari bamwe mu baturage bo muri aka gace bavuga ko bishimiye icyemezo cyo kumena izi nzoga kuko zishyira ubuzima bw’abazinywa mu kaga ndetse bikabangamira n’umutekano muri rusange.
Hari uwagize ati: “Hari abantu banywaga izi nzoga bagata ubwenge cyangwa bakarwara kubera uburyo zakorwagamo. Turashimira ubuyobozi kuba bwahagurutse bugakurikirana iki kibazo cyane ko uzinyweye bimworohera no kwica umutekano.”
Mugenzi we witwa Nzabonimana yavuze ko hakenewe gukomeza kugenzura ahakorerwa inzoga kugira ngo hirindwe ibikorwa bishobora kugira ingaruka mbi ku buzima bw’abaturage, ati: “Abakora ibintu nk’ibi baba bashaka inyungu gusa ntibatekereze ku buzima bw’abaturage. Ni byiza ko bakomeza kugenzurwa.”
Muri rusange muri uru ruganda hasanzwe inzoga zitaze mu bikoresho bya pulasitike bipima litiro ibihumbi 7, bifite agaciro k’asaga miliyoni 6 z’amafaranga y’u Rwanda zose ziramenwa.
Ubuyobozi bw’Akarere ka Nyagatare bukomeza gusaba abaturage gufatanya n’inzego z’umutekano mu kurwanya ibiyobyabwenge no gutanga amakuru ku bikorwa bishobora guhungabanya ubuzima n’umutekano by’abaturage.
