Kirehe: Urubyiruko rwashishikarijwe kwamamaza imishinga y’ubukerarugendo

Urubyiruko rwo mu karere ka Kirehe rurasabwa gukoresha ikoranabuhanga mu kwamamaza imishinga n’ibikorwa byarwo mu bijyanye n’ubukerarugendo, gukora inyigo z’imishinga yarwo no kugisha inama abamaze igihe kinini bashora imari mu bikorwa bitandukanye.

Ni inama yabaye kuri uyu wa 24 Gashyantare 2023 mu Karere ka Kirehe, aho abayitabiriye bagaragarijwe amahirwe ari mu bukerarugendo n’ibindi bikorwa biri muri aka Karere bikwiriye kubyazwa umusaruro biturutse mu ishoramari ry’abafatanyabikorwa b’Akarere ka Kirehe, mu rwego rwo kuzamura iterambere hifashishijwe n’ ikoranabuhanga.

Nzirabatinya Modeste, Umuyobozi w’Akarere ka Kirehe wungirije ushinzwe iterambere, yavuze ko ikoranabuhanga rifasha abikorera kwamamaza ibikorwa byabo, asaba urubyiruko kurikoresha kugira ngo iterambere ryabo ryiyongere.

Yagize ati: ”Urubyiruko mwige gukoresha ikoranabuhanga, buriya hari ukuntu ushora imari ukumva byararangiye kubera imishinga yanyu mwayishyize mu bikorwa, ariko iyo utamamaje igikorwa cyawe muri iki gihe, umuntu anyuraho atazi ibibera aho ukorera, rero mugerageze mwamamaze ibikorwa byanyu kugira ngo abantu bamenye ibyo mukora.”

Nzirabatinya agaruka ku nyigo yavuze ko mbere yuko urubyiruko rushora imari mu byo bakora bakwiye gutinyuka bagashaka amakuru kubyo bashaka gukora.

Ati:” Mutinyuke mukore inyigo z’ibintu mugiye gushoramo, murebe niba ahantu mugiye gushoramo imari bizakunda kuko hari abantu b’abahanga bazi kwiga inyigo bakamenya ahantu ho gukorera n’ibyo kuhakorera, nimukora inyigo neza rero muzatera imbere mu mishinga yanyu.”

Bamwe mu rubyiruko rwitabiriye iyi nama rwaganiriye na MUHAZIYACU ruvuga ko rugiye gutangira kwiga inyigo kandi rugakoresha ikoranabuhanga nk’isoko y’iterambere muri iki gihe.

Gisubizo Bright ufite kampani y’ubukerarugendo yitwa ’Akagera Bright tours’ yagize ati:” Ubu ngiye kwibanda ku kwamamaza ibikorwa byanjye, ndashyira ibintu ku rundi rwego ku buryo ibikorwa byanjye bizamenyekana, kandi nizeye ko nibimara kumenyekana nzabona abakerarugendo bazangana.”

Niyonshuti Ezira nawe ati: ”Gukora inyigo numvise umumaro wabyo kandi nanjye mu byo nkora byo kwamamaza ibikorwa biri inaha ndumva ngiye kuganira n’abafatanyabikorwa banjye bakamfasha gukora inyigo, ikindi kandi nzagisha inama abamaze kumenyera akazi nk’ako nkora bambwire uko nkwiriye gukora kugira ngo Kampani yange ya ‘Visit Kirehe’ izaguke mbone inyungu iyivuyemo.”

Muri iyi nama yo guteza imbere ishoramari yateguwe n’Akarere ka Kirehe gafatanyije n’Urwego rw’Igihugu rw’ iterambere-RDB, yitabiriwe n’ abikorera, na bamwe mu rubyiruko ruharanira guteza imbere Akarere ka Kirehe binyuze mu bikorwa bakora.

Abitabiriye iyi nama basobanuriwe na Namara Frank Umuyobozi muri RDB serivisi uru rwego rw’iterambere rutanga zirimo n’izo gutanga inguzanyo ku bifuza kubaka inganda n’amahoteri.

Mu Karere ka Kirehe habarurwamo urubyiruko rusaga ibihumbi 110.

Abifuza gushyira imishinga yabo mu bikorwa, bakaba bashishikarizwa kwita ku nyigo z’imishinga yabo, bakamamaza ibikorwa byabo batibagiwe no kugisha inama; mu rwego rwo guteza imbere igihugu n’Akarere ka Kirehe muri rusange.