Umusore w’imyaka 18 wo mu Murenge wa Musaza, Akarere ka Kirehe yatawe muri yombi akurikiranweho gusambanya umukobwa w’imyaka 17, bashakaga kubana.
Umunyamabanga Nshingwabikorwa w’Umurenge wa Musaza, Bihoyiki Leonard yabwiye MUHAZIYACU iby’aya makuru.
Ati: “Ni byo, ni umusore wo mu Mudugudu wa Ryabega, Akagari ka Mubuga, ejo bundi ku itariki ya 17 yasambanyije umwana ariko asa n’uwamushatse agiye kumugira umugore, uwo mukobwa afite imyaka 17, umusore afite imyaka 18, barashakana. Ubwo rero ejo byaje kumenyekana ko bararanye.”
Uyu muyobozi avuga ko abaturage ari bo batanze amakuru biba ngombwa ko uwo musore afatwa ashyikirizwa Urwego rw’Ubugenzacyaha -RIB, umukobwa na we yoherezwa kwa muganga.
Amakuru ahari kandi ni uko umukobwa n’umuhungu basa n’abari babyumvikanyeho mbere, ndetse bananogeje umugambi wo kubana nk’umugore n’umugabo; mu gihe amategeko atabyemera.
Gitifu Bihoyiki ni byo akomeza agarukaho ati: “Amategeko ntabwo abyemera, kuko nubwo harimo icyinyuranyo cy’umwaka umwe, ariko umuhungu arajya mu cyiciro cy’abantu bakuze umukobwa akajya mu bana, kandi itegeko rirengera umwana; uwo mukobwa ari munsi y’imyaka 18.”
Ubuyobozi bw’Umurenge wa Musaza buratanga ubutumwa bukangurira abana gushyira imbere gukunda ishuri bakabanza bakiga bakazashinga ingo bakuze, gukangurira ababyeyi guha uburere bwiza abana babo, ndetse no gusaba abaturage kujya batanga amakuru hagakumirwa ubusambanyi.
