Gahunda y’igiti cy’ubuzima yagize uruhare runini mu bumwe n’ubwiyunge ndetse n’abari barabaswe n’ingeso mbi barahinduka baba ab’umumaro mu muryango mugari, imiryango yari ibanye mu makimbirane, n’abari baratakaje icyizere cy’ubuzima bongera kwibona banyotewe nabwo.
Binyuze mu matsinda y’abubatsi b’amahoro, abahuye n’ibikomere bitandukanye bicara hamwe bakaganira ku mateka yabo ashaririye banyuzemo, umwe agatega amatwi mugenzi we, akabasha kubohoka, bakaboneraho umwanya wo gushaka ibisubizo by’ibibazo buri umwe yahuye na byo mu buzima akongera kwibona mu muryango mugari.
Aya matsinda y’abubatsi b’amahoro ahanini aba agizwe n’abarokotse Jenoside yakorewe abatutsi yabaye mu Rwanda mu mwaka 1994, abayikoze bagafungwa barangiza ibihano byabo bagataha, imiryango yabanaga mu makimbirane, abahoze ari nk’ibicibwa muri rubanda kubera ibikorwa byabo bibi byiganjemo ubujura, ndetse n’abandi bagiye bahura n’ibibazo bitandukanye mu buzima bikabatera ibikomere.
Bigizwemo uruhare n’umuryango ukora ibikorwa by’isanamitima witwa ‘Ubuntu Center for Peace’, wafashe aba bantu bose bahuye n’ibikomere ubabumbira mu matsinda, ibita “Abubatsi b’amahoro” bahabwa amasomo atandukanye, aherekeranywa n’imyitozo mvura buzima ndetse n’igamije gukangura umubiri no kongera ituze byose bigaherekezwa n’imigenzo mbonezamuco. Muri ibyo bikorwa harimo icyo bise “Igiti cy’ubuzima”.
Igiti cy’ubuzima gikunze kugarukwaho na benshi bari muri aya matsinda, ngo ni igiti gishushanya imibereho y’umuntu nyawe. Imizi yacyo ishushanya ahahise h’umuntu, igihimba cyacyo kigaragaza wowe wa none, amashami y’iki giti, agaragaza abakuzengurutse cyangwa ibyo ufite none. Amababi y’iki giti agaragaza abantu bawe ba hafi ndetse n’ibyo ukunda.
Iki giti kandi gifite imbuto, nazo ziri mu moko abiri, imbuto zihishije zigaragaza ibyo umaze kugeraho, imbuto zitarahishira zitwa ibitumbwe ni ibyo uteganya kugeraho bituma abari muri aya matsinda bagira impumbero. Amahwa yacyo ashushanya inzitizi zituma utagera ku ntego zawe.
Abagize amatsinda y’abubatsi b’amahoro, bahoze mu ngeso mbi nk’ubujura n’ urugomo MUHAZIYACU yaganiriye nabo, bavuga ko kuba muri aya matsinda byabagiriye akamaro ariko by’umwihariko iki giti cy’ubuzima cyatumye bongera kwitekerezaho batangira kubaka ejo hazaza habo heza.
Akimanizanye Françoise utuye mu Murenge wa Mushikiri yagize ati: “Njyewe ntaragera muri aya matsinda y’abubatsi b’amahoro nari umuntu mubi cyane, nirirwaga ndwana ugasanga ahantu ndi ndangwa n’urugomo. Igiti cy’ubuzima gishushanya ubuzima bwanjye kandi nkimara kukimenya, cyangiriye akamaro kuko kinyibutsa amateka yanjye, njyewe wa none, ubundi nkareba neza imbuto mfite zizashya, ni iki kizatuma zidashya ubwo aho mba ndi kuvuga imishinga yanjye. Ubu narahindutse mba umuntu mwiza kandi byangiriye akamaro n’abo tubana.”
Byiringiro Hosea yagize ati: “Nahoze ndi umujura ruharwa, abantu bambona bagakinga amazu yabo, ku buryo nanjye ubwanjye numvaga ndi ikibazo, abubatsi b’amahoro baje kunsura mvuye muri gereza. Ariko kubera inyigisho bampaye ubu nabaye umuntu mwiza. Binyuze ku giti cy’ubuzima ubu mfite imishinga nifuza kugeraho kandi binyuze mu kungurana ibitekerezo na bagenzi banjye nizeye ko nzabigeraho, ubu nahize imihigo.”
Komezurukundo Françoise, utuye mu Murenge wa Nasho yagize ati: “Kubera ibikomere bituruka ku mateka twanyuzemo usanga hari abantu bagifite ibyo bikomere binyuze mu matsinda yacu abo bose babasha kubohoka. Abandi ni abantu babana mu makimbirane iyo baje hano bariyunga. Igiti cy’ubuzima ni indorerwamo twireberamo tugahinduka.”
Mukeshimana Marie Louise, Ushinzwe amahugurwa mu muryango ukora ibikorwa by’isanamitima witwa ‘Ubuntu Center for Peace’, avuga ko bakora ibikorwa bitandukanye bigamije gushakira hamwe ibisubizo abahuye n’ibikomere bitandukanye bitewe n’ibyo banyuzemo.
Agaruka ku giti cy’ubuzima, Mukeshimana yavuze ko iki giti ari indorerwamo buri wese ashobora kwireberamo.
Yagize ati: “Iki giti gishushanya ubuzima bw’umuntu, ibyo yanyuzemo, anyuramo, abamukikije ndetse n’icyo yifuza kugeraho. Iyo umuntu uremerewe abashije kwigereranya n’iki giti, ibibazo byose yahuye na byo abasha kubivuga. Hakanabamo gahunda yo kunganirana bakurikije ibibazo byabo bafite. Iki giti gitanga umusaruro cyane, burya umuntu abashije kumenya iyo ava, akamenya iyo ari, akamenya naho ashaka kugera, by’umwihariko akamenya uburyo yakifashisha kugira ngo ahagere, biroroshye cyane kuhagera. Abenshi babashije kwigobotora amateka, usanga bavuga ngo nasanze ntari njyenyine.”
Muri uyu muryango ukora ibikorwa by’isanamitima witwa ‘Ubuntu Center for Peace’ kubera amateka ya Jenoside yakorewe Abatutsi mu 1994 Igihugu cyanyuzemo, hahuriramo abakoze Jenoside n’abayikorewe.
Agaruka kuri iyi ngingo, Mukeshimana avuga ko bitangira bigoye ariko binyuze mu biganiro habaho gusabana imbabazi abantu bakiyunga.
Yagize ati: “Abantu benshi bakunda kwibaza iki kibazo ariko kubera ko tuza tugamije gutega amatwi ikintu umuntu wese azanye abantu baracyumva, bakagishakira igisubizo. Iyo bigitangira abantu bakumva bakomerekezanyije, cyangwa se akumva ntibimworoheye, ariko iyo binyuze mu biganiro basanga buri wese ibyo yanyuzemo aremerewe, bakaboneraho umwanya wo kwibaza ati: ‘burya bya bindi twakoreye aba ngaba ni uru rwego byabagejejeho?’ bakaboneraho n’umwanya wo gusabana imbabazi.”
Mukandayisenga Janvière, Umuyobozi w’Akarere ka Kirehe wungirije ushinzwe imibereho myiza, avuga ko abari muri aya matsinda bakwiye gushyira mu bikorwa inyigisho bahabwa kandi bakazigisha n’abo baturanye.
Yagize ati: “Buri wese uri hano afite ubuhamya bw’ibyo yanyuzemo kandi hari impamvu ikomeye yatumye bamuhitamo bakamuzana hano. Icyo mbasaba ni ugukomereza aho, ntimuzasubire inyuma. Ibibazo ufite mu mutima wawe, ntibikaguherane, mukomeze urugamba rwo kwiteza imbere dufatanije. Ikindi, mube urumuri rw’abaturanyi banyu, mwese mubane mu mahoro.”
Mu Karere ka Kirehe kuva mu mwaka wa 2024 Umuryango ‘Ubuntu Center for Peace’ uhakorera umaze guhugura abantu barenga 3,600; ufite intego yo kuzahugura abarenga 5,000 mu mpera za Kamena 2025.
