Ubuyobozi bw’Akarere ka Kirehe n’ubw’urugaga rw’abikorera(PSF) buratangaza ko hagiye gushyirwa imbaraga mu gukangurira abacuruzi bo muri aka Karere gukoresha imashini itanga inyemezabwishyu mu buryo bw’ikoranabuhanga izwi nka EBM n’akamaro kayo mu gukora ibaruramari ry’umunsi.
Ibi biri mu byagarutsweho kuri uyu wa Mbere tariki ya 6 Werurwe 2023 ubwo hemezwaga ingengo y’imari ivuguruye y’Akarere ka Kirehe. Ni ingengo y’imari yemejwe n’Inama Njyanama y’Akarere aho yavuye kuri 31,532,379,293 Frw igera kuri 32,217, 819,017Frw.
Muri iyi nama hagaragajwe ko umubare w’abakoresha EBM muri aka Karere ukiri hasi, maze ubuyobozi bugaragaza zimwe mu ngamba zihari zizatuma abacuruzi benshi barushaho gukoresha EBM.
Umuyobozi w’Akarere Rangira Bruno yagize ati: “Mu rwego rwo gufasha abacuruzi gusobanukirwa ikoreshwa ry’iriya mashini ibafasha kwishyura imisoro no kugenzura imishinga y’ubucuruzi, hari ubukangurambaga twatangije, tumaze kujya mu mirenge yose igize Akarere kacu kandi abacuruzi bagenda bumva neza ubu buryo.”
Meya Rangira yavuze ko bari gufatanya na Polisi ndetse n’Ikigo cy’Igihugu gishinzwe imisoro n’amahooro(RRA) kugira ngo abacuruzi babashe gusobanukirwa neza ubu buryo bwo gutanga imisoro hakoreshejwe EBM.
EBM, ni uburyo bwashyizweho bufasha gutanga inyemezabwishyu(facture) hadakoreshejwe intoki ahubwo hakifashishwa imashini mu buryo bw’ikoranabuhanga
Umuyobozi w’Urugaga rw’Abikorera(PSF) mu Karere ka Kirehe Ndungutse Jean Bosco yasabye abacuruzi guhindura imyumvire bafite ku ikoreshwa ry’imashini ya EBM.
Ati: “Ndasaba abikorera cyane cyane abacuruzi, bahindure imicururize n’imitekerereze bumve ko ibyo ubuyobozi bw’igihugu cyacu budutekerereza ari byiza, EBM ifite akamaro gakomeye kuko igufasha gukora ibaruramari ry’ibyo uba wakoze umunsi ku munsi niyo mpamvu tubakangurira kandi tukabasobanurira ko ibyo batekereza ko ngo iyi mashini ibafata amajwi n’ibindi babireka.”
Ingengo y’imari ivuguruye y’Akarere ka Kirehe yiyongereyeho 2%, ahagaragajwe imbogamizi ku myinjirize y’imisoro aho abakoresha inyemezabwishyu za EBM batari baba benshi akaba ariyo mpamvu Akarere kashyize imbaraga mu bukangurambaga.
