Umugore witwa Mukanoheri ufite imyaka 27 y’amavuko ari gushakishwa n’inzego z’umutekano nyuma yo gukekwaho gutera icyuma umugabo we ku nda ubwo bashyamiranaga mu ijoro ryakeye.
Ibi byabereye mu Mudugudu wa Gakurazo mu Kagari ka Kayonza mu Murenge wa Mukarange.
Amakuru agera kuri MUHAZIYACU avuga ko uyu mugore yateye icyuma umugabo we ubwo bashyamiranaga nyuma yaho umugore yari atashye yasinze kandi agataha mu gicuku.
Umwe mu baturanyi b’uyu muryango yavuze ko nyuma yo kumutera icyuma umugabo yavugije induru naho umugore ahita afata inzira arahunga.
Murekezi Claude uyobora Umurenge wa Mukarange yemereye MUHAZIYACU ko koko bari gushakisha uyu mugore ngo kuko yateye icyuma ku nda y’umugabo we.
Ati “ Yamuteye icyuma kimukomeretsa ku nda gusa yajyanywe kwa muganga baramudoda arakira ariko umugore we yahise aburirwa irengero na n’ubu turacyamushakisha.”
Murekezi yavuze ko bidakwiriye kubona umugore n’umugabo barwanira imbere y’abana babo asaba abashakanye kujya bagana ubuyobozi bukabafasha gukemura amakimbirane bagiranye.
