Ubuyobozi bw’Umuryango Komera ufite inshingano zo kubaka icyizere mu bana b’abakobwa ukorera mu karere ka Kayonza butangaza ko mu myaka irindwi ishize uyu muryango umaze gufasha abana b’abakobwa basaga 5000.
Mukamusonera Dative Umuyobozi wa Komera yemeza ko igihe bamaze bakora hari abana b’abakobwa bafashije kwishyurira amashuri baturuka mu miryango itishoboye, ababyaye inda z’imburagihe n’imiryango yabo.
Yakomeje agira ati: “Tumaze gufasha abana b’abakobwa barenga 5000, abana banyuze muri poroguramu zacu bariga bagatsinda ndetse n’abaje barasitaye bakabyara inda z’imburagihe ubu bigiriye icyizere bari mu mirimo itandukanye mu bikorwa bitandukanye.”
Abatesi Kevine ni umwe mu bana bafashijwe na Komera guhera mu mwaka wa 2020, avuga ko yafashijwe kubona ibikoresho by’ishuri, amafaranga y’ishuri ndetse n’ababyeyi be bafashwa kwihuriza hamwe n’abandi muri koperative.
Abatesi yakomeje agira ati: “Mbere niga byarangoraga kubona amafaranga y’ishuri, ntabwo badufasha twenyine ahubwo bafasha n’ababyeyi bacu.”
Niyonsenga Anita ni umwe mu bana bafashwa na Komera na we yagize ati: “Kuri twe tubana na Komera ni ikintu kigari cyane ariko nyine gifasha abakobwa, ni agaciro n’ubuzima bw’umukobwa; Komera yahinduye ubuzima bwacu ihindura n’imiryango yacu.”
Abana b’abakobwa bafashwa kwishyurirwa amashuri guhera mu mashuri yisumbuye, na Kaminuza abatabishoboye bagafashwa kwiga imyuga, aba nabo nyuma yo kwiga imyuga bafashwa kubona ibikoresho n’igishoro kizabafasha gutangira gukora.
