Ababyeyi 31 bo mu Karere ka Kayonza basoje amahugurwa y’amezi atandatu agamije kubigisha uburyo barera abana babo neza bakabarinda ihohoterwa n’ingeso mbi zatuma bajya kuba mu buzima bwo ku muhanda.
Aya mahugurwa yatanzwe n’ikigo gisanzwe cyita ku bana bakurwa mu muhanda SACCA, aho yatanzwe ku babyeyi 31 bo mu Karere ka Kayonza mu gihe cy’amezi atandatu.
Aba babyeyi bigishijwe ibiganiro icyenda birimo kubongerera ubumenyi bafite ku myifatire n’imyitwarire y’abana biyomeka ku bantu bakuru bagamije kubona umutekano n’urukundo bakene, indagagaciro z’umuryango wakira umwana, gufasha umwana gutekana mu muryango, uburyo umuntu ufashe umwana akoresha ngo abone umutekano akeneye.
Babonye kandi ikiganiro cyo guhuza imirimo bakora no kwita ku bana, gutoza abana n’urubyiruko kumenya kwihangana, kuba abanyanyamwuga mu kwita ku mwana n’urubyiruko bya kinyamwuga n’ibindi bitandukanye bigamije kubakarishya ubumenyi.
Nyuma y’ibi biganiro bamwe mu babyeyi babwiye MUHAZIYACU ko bahungukiye ubumenyi bwinshi buzabafasha gukomeza kwita ku bana neza.
Batamuriza Ernestine utuye mu Mudugudu wa Gasogororo mu Kagari ka Kayonza mu Murenge wa Mukarange, yavuze ubu yamenye neza kwita ku bana be n’abo abandi.
Ati “ Nahuguwe kuba umunyamwuga mu kurera abana, yaba uwanjye n’uwutari uwanjye, nigiyemo guha umwana umwanya akampa ibitekerezo aho kugira ngo numve ko ari njye gusa ukwiriye kumuganiriza we simutege amatwi.”
Maniraguha Claude we yavuze ko amahugurwa yahawe yatumye amenya uburyo aganira n’abana be akamenya n’inama yamugira bitewe n’ubuzima arimo ako kanya.
Ati: “Hari ubwo utaha ntumenye kuganiriza umwana ngo umenye ubuzima yiriwemo, ubu barabitwigishije ikindi batwigishije uko twabana n’abana bashya mu muryango wacu.”
Mukandori Sauda usanzwe urera umaze imyaka itatu n’amezi arera umwana wakuriye mu buzima bwo ku muhanda, we yavuze ko amahugurwa yahawe yayamenyeyemo uburyo iyo wakiriye umwana mushya mu muryango wamufata neza akazavamo umwana mwiza.
Umuyobozi wa SACCA, Mukamuyenzi Valentine yasabye ababyeyi bahuguwe gukoresha neza inyigisho bahawe mu kwita ku bana babo no kwita ku muryango nyarwanda.
Ati: “Kurera umwana neza ukamuha umutekano,ukamwumva niyo ntego ya bano babyeyi, twe ku giti cyacu twigishije abana neza twabarinda ihohoterwa.”
Aba babyeyi bahawe impamyabushobozi zerekana ko bigishijwe neza muri aya mezi atandatu. SACCA ni ikigo gisanzwe cyita ku bana bakurwa mu muhanda kikabahindurira ubuzima.
