Abakozi bane bakoraga mu Bitaro bya Rwinkwavu biherereye mu Karere ka Kayonza, batawe muri yombi nyuma yo gufatanwa ibikoresho bitandukanye bari bibye mu bitaro.
Aba bakozi bafashwe ku wa Kane tariki ya 16 Ukuboza 2021, mu bafashwe harimo abakoraga isuku batatu ndetse n’umuzamu aho bakurikiranyweho kwiba ibikoresho bitandukanye birimo na matera z’ibi bitaro.
Umunyamabanga Nshingwabikorwa w’Umurenge wa Rwinkwavu, Murekezi Claude ubwo yaganiraga na MUHAZIYACU yemeje aya makuru.
Yagize ati “Ni abakozi bakoraga mu Bitaro bya Rwinkwavu, bagambanye n’umurinzi biba matera esheshatu n’ibindi bikoresho bitandukanye mu bitaro, ejo rero twarabibafatanye duhita tubashyikiriza RIB itangira akazi kayo.”
Uyu muyobozi yavuze ko abafashwe ari abari bashinzwe gukora amasuku ndetse n’umuzamu bose bakaba bari barafatanyije mu kubinyereza.
Mu byo batwaye harimo matera esheshatu, amasahani, rido, ibikoresho by’isuku nk’amasabune n’ibindi byinshi bakoreshaga, ngo bavuganaga n’uwo muzamu bakabimunyuzaho akabyirengagiza.
Gitifu Murekezi yavuze ko bibabaje kubona umukozi nk’uwo yiba asaba abaturage kureka ingeso mbi nk’izi zatuma abantu babatera icyizere.
Kuri ubu aba bakozi bose uko ari bane bafungiwe kuri sitasiyo ya RIB ya Rwinkwavu mu gihe hatangiye iperereza ngo hamenyekane niba haba hari n’ibindi byinshi baba baribye.
ABAKOZI BAKORA MUBITARO BY’ARWINKWAVU BANE BIBYE IBIKORESHO Iyi nkuru uburyo yanditswe ndumva ikwiriye gukosorwa kubera ndumva byagaragaza isura mbi kubakozi Bose bahakora.
Ndumva yakanditswe igira iti: ABAKORA ISUKU N’UMUZAMU bibye ibikoresho by’bitaro by’a Rwinkwavu abo bakozi ndatekereza ko ari abakozi bafite ishyirahamwe ribagenga Atari abakozi bibitaro batagengwa na Status y’ibitaro
Barahokora nibyo ariko ntabwo arabakozi bibitaro.