Nyuma y’uko hagaragaye ikibazo cy’abana bo mu Karere ka Gatsibo bari baraburiwe irengero ariko ubu bakaba barabonetse mu Karere ka Kayonza bagasubizwa mu miryango yabo, Ubuyobozi burasaba ababyeyi gukurikirana abana babo nk’inshingano zabo.
Tariki ya 24 Mata 2024, ni bwo hamenyekanye ko abana batatu bari mu kigero kimwe bakomoka mu Murenge wa Kiziguro mu Karere ka Gatsibo, bashimuswe, inzego z’ubuyobozi n’iz’umutekano zigakurikirana icyo kibazo, abana bakaboneka tariki ya 26 Mata 2024, mu Murenge wa Murundi, Akarere ka Kayonza.
Umuyobozi wa Akarere ka Gatsibo Gasana Richard, mu kiganiro yagiranye na MUHAZIYACU yavuze ko nyuma y’ibyabaye, Ubuyobozi bwarushijeho gukangurira abaturage cyane cyane ababyeyi, gucunga umutekano w’abana, igihe bajya cyangwa bava ku mashuri ndetse n’igihe bari mu rugo.
Yagize ati: “Kuba aba bana babonetse n’inkuru ishimishije, byaba ku bana ndetse n’ababyeyi babo ariko kandi turasaba ababyeyi kumenya inshingano zabo bagaha umwanya abana babo bakabaganiriza.”
Meya Gasana yakomeje ati: “Ababyeyi bajye bakurikirana abana bato ntibabohereze ku ishuri bonyine, ndetse nakurikirane niba bagezeyo amahoro, ikindi bakigisha abana kumenya ko bagomba gutegereza ababyeyi babo cyangwa undi muntu baturanye bizeye akabatahana.”
Meya yaboneyeho gusaba abaturage kujya batangira amakuru ku gihe ngo kuko iyo bayihererenya bituma inzego zibishinzwe zidatabara hakiri kare.
Kanamugire Innocent Umunyamabanga Nshirwabikorwa w’Umurenge wa Kiziguro we yagize ati: “Natwe abayobozi nyuma y’iki kibazo twahise dufata ingamba mu nama cyangwa se ahandi hahuriye abaturage tubibutsa ko bazajya bita ku bana babo babaha uburere ikindi bagatangira amakuru ku gihe.”
Gitifu Kanamugire avuga ko ubu abana aho basubiriye mu maboko y’ababyeyi babo ubu bameze neza, yongeyeho kandi ko ngo nyuma y’ibyabaye abona ababyeyi babikuyemo isomo ndetse ko banafashe ingamba zo kurinda abana babo aho bari hose.
Ubuyobozi bw’Akarere ka Gatsibo buvuga ko iperereza rigikomeje ngo hamenyekane icyateye gushimutwa kw’abo bana.
