Ingabo z’u Rwanda (RDF) n’Ingabo za Tanzania (TPDF) bashoje inama ya 14 y’abayobozi b’ingabo ku mipaka ihuza ibihugu byombi yaberaga mu Karere ka Ngoma, Intara y’Iburasirazuba kuva tariki 2 kugeza ku ya 4 Ukuboza 2025.Ni nama ishimangira umuhate wo kurushaho kubungabunga umutekano n’ituze ku mipaka ihuza u Rwanda na Tanzania.
Izi nama ziba buri mezi atatu kandi ziha uburyo bunoze , aba bayobozi baturutse mu bihugu byombi kugira ngo basuzume ibyavuye mu nama zabanje, basuzume aho umutekano uhagaze, kandi bategure ingamba zihamye zo gukemura ibibazo bivuka n’ibyambukiranya imipaka.
Muri iyi nama ya 14, basuzumye ibibazo byavutse kuva mu nama yabanje ya 13 yabereye i Ngara muri Tanzania muri Nzeri 2025, harimo amasezerano y’ubwumvikane ku mutekano wo ku mupaka ageze, ibikorwa bitemewe bikorerwa ku mipaka ndetse n’ingamba zirengera abatuye ku mipaka.
Gen. Maj Ruki Karusisi, Umuyobozi wa Divisiyo ya 5 y’ingabo za RDF, yagaragaje ko bishimiye ubufatanye bwubaka bwagaragajwe n’impande zombi.
Yagize Ati: “RDF na TPDF bafite umuco gakondo w’ubufatanye ushingiye ku bwubahane, ubunyamwuga, ndetse no kumvikana ku kamaro ko kubungabunga umutekano mu karere. Ibihugu byacu byombi byishimira umubano mwiza n’ubufatanye hagati y’ingabo zacu, ni imwe mu nkingi zishyigikira ubwo bucuti.”
Gen. Maj Karusisi akomeza agira ati “Binyuze mu mahuriro nk’aya, turemeza ko guhuza kwacu bikomeje kuba byiza, inzira zacu z’itumanaho zikomeza gukorera hamwe n’ubushobozi duhuza neza bwo kugaragaza imbogamizi zagaragaye.”
Brig. Gen Gabriel Elias Kwiligwa, Umuyobozi wa Brigade ya 202 y’ingabo za TPDF, akaba yari n’umuyobozi w’intumwa za TPDF, yashimye uburyo inama yagenze, avuga ko buri gihembwe bazakomeza gushimangira icyizere no guhuza ibikorwa hagati y’ingabo zombi.
Yagize ati “Twishimiye ubunyamwuga, ubwisanzure n’uburyo mwatwakiriye muri iyi nama. Ubufatanye butanga umusaruro hagati y’ingabo zacu zombi bugaragaza ko twiyemeje gukomeza kubungabunga imipaka itekanye no gukemura ibibazo byose hamwe.”
Inama yashojwe no kongera imihigo yo gukomeza guhanahana amakuru no gukora amarondo ahuriweho ahantu hagenwe.
Impande zombi zashimangiye ko ubufatanye hagati ya RDF na TPDF budashingiye ku mutekano w’igihugu gusa, ahubwo no ku mutekano n’imibereho myiza y’abaturage bo ku mipaka.
Bakimara kugera mu Rwanda, umunsi wa mbere w’inama wanaranzwe no gusura ahantu hahana imbibi hagaragara ibibazo by’umutekano bihangayikishije abaturage b’impande zombi. Impande zombi zasuye Mitako mu Murenge wa Nyamugali ndetse na Bitarimpura mu Murenge wa Kigarama mu Karere ka Kirehe.
Impande zombi zagaragaje ko hakenewe gufatwa ingamba zihutirwa mu gukumira ibikorwa binyuranyije n’amategeko byambukiranya umupaka no guhanga imishinga y’ubukungu izagirira akamaro abaturage bo ku mpande zombi z’umupaka.
