Perezida w’Inteko ishinga amategeko umutwe w’Abadepite Kazarwa Gertulde yitabiriye umuganda rusange usoza ukwezi kwa Gicurasi, aho yasuye inzu 10 zubakiwe abaturage bakuwe ahaturikirizwaga intambi mu bucukuzi bw’amabuye y’agaciro i Rwinkwavu. Abo baturage barashima Leta ko yaramiye ubuzima bwabo bwari mu kaga.
Hari imiryango 10 yamaze gutuzwa mu mudugudu wa Muganza mu kagari ka Nkondo mu Murenge wa Rwinkwavu. Iyi miryango ni imwe mu yari ifite ikibazo cy’uko inzu zabo zagirwaho ingaruka na bimwe mu bikorwa byo gucukura amabuye y’agaciro birimo nko guturitsa intambi byatumaga izi nzu ziyasa, abari bazituyemo bakagira ubwoba ko umunsi umwe zizabagwira.
Hari bamwe mu baturage batanze ubuhamya ubwo Perezida w’Inteko ishinga amategeko umutwe w’Abadepite Kazarwa Gertulde yasuraga uyu mudugudu, ubwo bari ku muganda rusange wakozwe hasiburwa umuhanda ugana kuri uyu mudugudu.
Mukashyaka Claire ni umwe muri aba baturage wemeza ko usibye kuba inzu zabo zarasenywaga no guturitsa intambi, n’abana babo bagiraga ubwoba iyo izi ntambi zaturitswaga.
Yakomeje agira ati: “Kwivuza byari bigoye kuko kuva aho twari dutuye kugera ku kigo nderabuzima byadusabaga amafaranga 1500Frw kuri moto, nta mashanyarazi twagiraga, nta mazi meza yahabaga, ariko aha batwimuriye biroroshye abana biga hafi y’amashuri, dufite umutekano, turashima Leta yacu yadufashije kudukura mu kaga.”
Ngabitsinze Emmanuel umwe mu baturage bavukiye i Rwinkwavu mu mwaka w’i 1959, avuga ko mbere ibikorwa by’ubucukuzi bw’amabuye y’agaciro byakorwaga mu nyungu z’Ababirigi aho kuba mu za Leta za kera, ndetse ko n’abaturage ubwabo batashoboraga kubona amashanyarazi kandi barakoraga aho yazanywe,
Yakomeje agira ati: “Ndi mu bantu bashima cyane Leta yacu na Perezida Kagame kuko nanjye ndi mu bimuwe mvanywe ahatukirizwaga intambi, inzu twajemo ni nziza kandi zujuje ibyangombwa byose.”
Perezida w’Inteko Ishingamategeko Umutwe w’Abadepite Kazarwa Gerturde yashimye ubuyobozi bw’akarere n’inzego bafatanya kuba baratekereje gukura aba baturage ahashyira ubuzima bwabo mu kaga, yanashimye ko n’ubwo hari indi miryango isigaye nayo iteganyiriza kuzubakirwa.
Yakomeje agira ati: “Uyu ni umugambi Igihugu cyihaye ugira uti Umuturage abe ku isonga, iyo umuturage ari ku isonga ibintu byose bigenda neza bifasha ko twese dukorera hamwe Igihugu cyacu kigatera imbere.”
Imiryango yose igomba kubakirwa ni 66 ikazimurwa ahakorerwa ubucukuzi bw’amabuye y’agaciro, ikazatuzwa muri uyu mudugudu wa Muganza.
Abaturage bimuwe muri ibyo bice baracyafite uburenganzira ku butaka bwabo basize aho bari batuye, ndetse banizezwa ko uwashaka kububyaza umusaruro mu buryo butashyira mu kaga ubuzima bwe yabikora.
