Tuyisenge Clémentine ni umuturage wo mu Karere ka Ngoma mu Murenge wa Kibungo, Akagari ka Mahango, avuga ko mbere yabaga mu nzu mbi yendaga kumugwaho, imuvira, akemeza ko yabagaho mu bwigunge, ariko kuri ubu akaba ashimira ubuyobozi bw’Akarere ka Ngoma bwamwubakiye inzu nziza yo kubamo, yujuje ibyangombwa byose.
Tuyisenge Clémentine yarokotse Jenoside yakorewe Abatutsi mu 1994, aho yaje kuba mu nzu yari imeze nabi, ubuyobozi bw’umudugudu bukamuha umuganda ariko ntibigire icyo bitanga kuko ibyo bubakaga byagezaga igihe bigasenyuka, ibintu byatumaga abaho mu bwoba bw’uko rimwe yari kuzamugwira.
Mu kiganiro yagiranye na MUHAZIYACU, Tuyisenge yagaragaje ko ubu afite ibyishimo byinshi by’inzu yahawe kubera ko ahantu yabaga hari hateye isoni, agashimira ubuyobozi bamwubakiye inzu.
Yagize ati: “Mbere nabaga mu nzu ikingishijwe akaryango gato, ku buryo najyaga kuryama nzi ngo abajura baraza bagakubite batugweho, imvura iyo yagwaga narabyukaga nkicara ku ntebe kuko mvuga nti abajura nibaza ndahita mvuza induru, ariko ubu ndaryama nkumva ndatuje. Ndashimira ubuyobozi bw’Akarere na Perezida wacu Paul Kagame wongeye gutuma tuba umwe. Ubu mbayeho neza nk’abandi.”
Umuyobozi w’Akarere ka Ngoma wungirije ushinzwe imibereho y’abaturage Mukayiranga Marie Gloriose avuga ko nk’ubuyobozi bw’Akarere intego bafite ari iyo kubakira abatishoboye kugira ngo babone aho kuba heza, yemeza ko ari ibikorwa bikorwa buri mwaka.
Yagize ati: “Kubakira abatishoboye ni gahunda dufite nk’akarere, aho buri mwaka tuba dufite imihigo y’ibyo tugomba gukora, icyo tubanza kureba ni ukumenya ngo abaturage dufite bafite amacumbi ni bangahe, abadafite amacumbi bangana gute, aho rero hari abaturage tubwira bakabyikorera kuko bafite ubushobozi, hari n’abo dufasha binyuze mu kubunganira aho dufatanya n’abaturage bakaduha imiganda ku buryo duhita tububakira. Hari abo twubakira inzu kuva hasi, aho dufatanya n’abaturage tukabashakira amacumbi, by’umwihariko abacitse ku icumu tubaba hafi tukabunganira tukabubakira. Icyo tubasaba ni ukujya babungabunga inzu baba bahawe.”
Mu mwaka ushize w’ingengo y’imari wa 2025-2026, ubuyobozi bw’Akarere ka Ngoma ku bufatanye n’abafatanyabikorwa batandukanye bubatse inzu 112, hasanwa izigera kuri 217, hubakwa ubwiherero 125, hasabwa ubugera kuri 417.
