Ikigo cy’amashuri cya Fawe giherereye mu Karere ka Kayonza mu Murenge wa Gahini cyatewe n’abajura biba uruzitiro rwa senyenge rureshya na metero 70, Ubuyobozi bukaba buvuga ko hatangiye iperereza.
Umunyamabanga Nshingwabikorwa w’agateganyo w’Umurenge wa Gahini, Ruremire Augustin, aganira na MUHAZIYACU, yavuze ko iki kigo kibwe ku munsi w’ejo ariko ngo abakibye ntibaramenyekana.
Ati: “Ejo nka saa tatu nibwo batubwiye ko bibwe, tujyayo dusanga bafite abarinzi batanu kandi ikigo cyabo ni kinini cyane, urebye abajura baciye uruzitiro rwose n’amatube yari arufashe; byose baratwara.”
Yakomeje avuga hatangiye iperereza ngo hamenyekane abajura bakoze ibi, gusa ngo banagiriye inama abayobozi b’iki kigo yo kongera abarinzi ngo kuko igice bibyeho usanga nta barinzi bahacunga bahari.
Ikigo cya Fawe ni kimwe mu bitangirwamo uburezi ku bana b’abakobwa ndetse kiri mu bikunze gutsindisha neza,
Mu minsi ishize bakiriye nyampinga w’u Rwanda wa 2022, Muheto Divine, aho yari agiye kubashimira uburere bamuhaye bwanatumye yegukana ikamba.
