Mu rwego rwo kugabanya ubucukike mu mashuri, Leta yashyizeho gahunda yo kubaka ibyumba by’amashuri bishya, mu kigo cy’amashuri abanza cya Gacaca, mu Murenge wa Murundi, mu Karere ka Kayonza, hubatswe ibyumba birindwi, ariko hiyongeraho n’igishushanyo cyerekana ko ari ibihe bidasanzwe.
Nyuma y’amezi arindwi amashuri amaze afunze, mu gihe afunguye, buri munyeshuri, umurezi, ndetse n’undi uwariwe wese agomba guhora yambaye agapfukamunwa, nk’uko bigaragazwa mu gishushanyo.
Nk’uko bisobanurwa n’umuyobozi w’iri shuri, Nsanzumuhire Emely Patrick, ibi byakozwe ku bushobozi bw’ikigo, hifashishijwe amafaranga bita “capitation grant.”
“Capitation grant” ni amafaranga atangwa na Minisiteri y’Uburezi yunganira amashuri mu kugaburira abanyeshuri no mu bindi bikorwa binyuranye.
Nsanzumuhire yabwiye MUHAZIYACU ati: “Ibyaribyobyose abana nibaba bari hanze bazasoma amabwiriza, nibagera mu ishuri natwe abarezi tuzakomeza kubashishikariza no kubibutsa. Kwigisha ni uguhozaho, tuzakora uko dushoboye, kandi tuzabigeraho turabyizeye.”
Mu Karere ka Kayonza harimo kubakwa ibyumba by’amashuri 840, kuri ubu ibimaze kuzura 143 byatashywe tariki ya 16 Ukwakira, ibindi nabyo byegereje icyiciro cyo gusakarwa.
