Habimana Theoneste na Niyonsaba Jeanine ni umuryango utuye mu Mudugudu wa Rwagashyaba, mu Kagari ka Gakenke, mu Murenge wa Kiramuruzi, bavuga ko bataraganirizwa n’umuryango RWAMREC bahoraga mu ntonganya n’amakimbirane adashira mu muryango wabo, ariko ko nyuma yo kuganirizwa bicaye nk’umuruango bagasiga amakimbirane inyuma none kuri ubu bakaba bakataje mu bikorwa bibateza imbere.
Babigarutseho mu buhamya batanze kuri uyu wa 22 Nzeri 2026, mu gutangiza icyumweru cyahariwe kwimakaza ihame ry’uburinganire mu Ntara y’Iburasorazuba, gifite insangamatsiko igira iti: “Ihame ry’uburinganire, inkingi y’imiyoborere myiza n’iterambere ridaheza kandi rirambye.”
Habimana Theoneste avuga ko mbere yo kwigishwa yabaga ameze nk’intare murugo arangwa n’amahane menshi, umugore adashobora kumubaza uko akoresha umutungo w’urugo.
Yagize ati: ” Mbere natahaga numva meze nk’intare itashye , nkataha kandi nasinze umutungo w’urugo nawangije, icyo gihe kandi umugore ntiyashoboraga kumbaza uko nakoresheje amafaranga, ariko tumaze guhugurwa nasanze naratakazaga byinshi mu buryo budakwiye, ubu njyewe n’umugore wanjye dushyize hamwe kandi turakora iterambere rikagaragara kubera ko dushyize hamwe.”
Niyonsaba Jeanine na we avuga ko nyuma yo kuva mu makimbirane ubu bashyize hamwe nk’umuryango kandi ko bakora ibikorwa bibateza imbere, ati: ” Tukibana mu makimbirane umugabo yatahaga yasinze ambwira nabi ngo ubundi wowe wazanye iki, n’umwana yarwara namubwira akanyiyama, ariko aho tumaze guhugurirwa na (RWAMREC) ubu dushyira hamwe tugakora ubu twaguze amatungo murugo arahari, ibyo tugiye gukora byose turabanza tukaganira kandi biradufasha mu kubaka urugo rwacu mu mahoro n’iterambere.”
Umuyobozi w’Akarere ka Gatsibo wungirije ushinzwe imibereho myiza y’abaturage Mukamana Marceline yasabye abaturage kwirinda amakimbirana bagaharanira kubaka umuryango ushoboye kandi utekanye.
Yagize ati: “Mu bikorwa dukora byubakiye ku kubaka umuryango ushoboye kandi utekanye, igihe nk’iki rero dushishikariza kandi tugafasha imiryango ikibanye mu makimbirane kuyasohokamo dufatanyije n’abafatanyabikorwa bacu, kandi iyo turebye tubona bitanga umusaruro kuko tubona imiryango iza igatanga ubuhamya bemeza ko bahoze babanye mu makimbirane ariko ko bashoboye kuyavamo. Turakomeza ubukangurambaga no kuganiriza imiryango ibanye mu makimbirane tukayigisha ndetse tukayiherekeza kugeza ibaye imiryango itekanye.”
Ubuyobozi bw’Akarere ka Gatsibo buvuga ko muri iki Cyumweru cyahariwe kwimakaza ihame ry’uburinganire n’ubwuzuzanye kizasozwa ku ya 30 Nzeri 2026, hazibandwa ku gukemura ibibazo by’amakimbirane mu miryango, kwigisha no gushishikariza imiryango ikibana mu buryo butemewe n’amategeko gusezerana ku bushake ku buryo bukurikije amategeko, serivisi z’irangamimerere n’ubukangurambaga bugamije gukumira inda ziterwa abangavu, byose bigamije kubaka umuryango utekanye.
