Ihuriro ry’urubyiruko rwo mu turere twa Nyagatare, Gatsibo na Kayonza bibutse ku nshuro ya 28 Jenoside ya korewe Abatusi mu 1994 by’umwihariko urubyiruko rwishwe muri Jenoside, biyemeza guhaguraka bakimana Igihugu cy’u Rwanda bakarwanya abahakana, abapfobya Jenoside n’abagoreka amateka.
Muri uyu muhango wo kwibuka ku nshuro ya 28 Jenoside yakorewe Abatutsi by’umwihariko urubyiruko wabaye kuri uyu wa Gatanu tariki ya 20 Ggicurasi 2022, witabiriwe na Madame Batamuliza Mireille Umunyamabanga Uhoraho muri Minisiteri y’uburinganire n’iterambere ry’umuryango, urubyiruko rusanga 300 ruhagarariye abandi rwaturutse mu turere dutatu; n’abandi bayobozi.
Batamuliza Mireille yasabye urubyiruko kubeshyuza ibinyoma by’abasebya u Rwanda ati: “Mubeshyuze ibinyoma by’abasebya u Rwanda n’ubuyobozi w’Igihugu n’abagoreka amateka yacu, ahubwo mugaragaze ibyiza u Rwanda rwagezeho, nibwo muba mutanze umusanzu. Mukoreshe imbugankoranyambaga nka Twitter mufotore urwibutso n’ahandi hagaragara amateka mugaragaze amateka y’ukuri musobanure n’utazi u Rwanda arumenye.”
Batamuliza avuga ko urubyiruko ari mbaraga z’igihugu iyo ruhawe umurongo mwiza, abasaba kumenya amateka y’Igihugu n’ibyagisenye no kumenya uburyo bagomba ku cyubaka.
Ati: “Urubyiruko murasabwa kumenya amateka y’Igihugu cyacu, kumenya ibyagishenye hanyuma no kumenya uburyo mugomba kucyubaka mugira uruhare mu buryo butandukanye Leta yashyizeho mutanga ibitekerezo mu nzego zihari.”
Rutaburingoga James wo mu Karere ka Gatsibo avuga ko nk’urubyiruko biyemeje guhangana n’abapfobya Jenoside yakorewe Abatutsi, ati: “Nk’urubyiruko twatojwe, tugiye guhaguruka twimane Igihugu cyacu ,tukirwanirire bitari mu buryo bw’amasasu kuko ababyeyi bacu barabirangije, bamaze kudutegurira, icyo tugiye gukora ni uguhangana n’abapfobya Jenoside bagoreka amateka yacu; tugiye guhuza imbaraga twunge ubumwe kugira ngo dukomeze kurinda ibyagezweho.”
Rutaburingoga yakomeje ashimira Inkotanyi zamurokoye ati:”Ndashimira Inkotanyi zaturokoye ziduha ubuzima n’umucyo, kandi tuzusa ikivu urubyiruko bagenzi bacu basize batushije.”
Gisa Silas waje aturutse i Nyagatare avuga ko we n’abagenzi be bagiye gukomeza gufatikanya mu bikorwa byo kurwanya ingengabitekerezo ya Jenoside, ati: “Tugiye gukomeza dufatanye turwanye ingengabitekerezo ya Jenoside n’abantu baharabika Igihugu cyacu banapfobya amateka yacu, urubyiruko dufite uruhare runini kugira ngo Jenoside itazongera kubaho.”
Uyu munsi wo kwibuka urubyiruko rwishwe muri Jenoside yakorewe Abatutsi mu 1994 wari ufite insanganyamatsiko igira iti: “Urubyiruko twahisemo kuba umwe –Igihango cyacu.”
Muri uyu muhango wo kwibuka ku nshuro ya 28 Jenoside yakorewe Abatutsi mu 1994 by’umwihariko urubyiruko rwishwe i Gatsibo, ahari hahuriye urubyiruko rwo mu turere twa Kayonza, Nyagatare na Gatsibo hasomwe amazina 28 y’abari urubyiruko bamenyekanye bishwe.
