Urubyiruko rw’abakorerabushake rwo mu Murenge wa Kiramuruzi, Akarere ka Gatsibo rugaragaza ko rugorwa n’abantu bamwe batubahiriza amabwiriza yo kwirinda Covid-19, rwanabasobanurira ngo ukabona badashaka kubyumva.
Ni mu gihe mu gihugu hose hari urubyiruko rw’abakorerabushake rugera ku bihumbi 300, muri rwo harimo abafashe iya mbere gutanga umusanzu wabo mu guhashya Icyorezo cya Covid 19.
Uru rubyiruko rufatanya n’inzego bwite za Leta, aho bagenda bakora ubukangurambaga no kugenzura niba amabwiriza n’ingamba zo kwirinda iki cyorezo, zubahirizwa uko bikwiye.
Abakorera mu Murenge wa Kiramuruzi bagaragaza ko mu bukangurambaga bakora bwo kurwanya iki cyorezo hari imbogamizi bahura na zo z’ abantu batubahiriza amabwiriza ndetse banabasobanurira ntibabyiteho kandi bigamije kurengera ubuzima bwabo.
Ahishakiye Patrick, Umuhuzabikorwa w’urubyiruko rw’abakorerabushake mu Murenge wa Kiramuruzi yagize ati: “Imbogamizi duhura na zo nko mu myumvire cyane, kuko usanga hari abantu bakubwira ko agapfukamunwa kukambara bitabuza uwandura kwandura, ubwo bikadusaba ko dufata umwanya uhagije wo kubasobanurira”
Niyodusaba Aisha na we ni umukorerabushake muri uyu murenge,
Ati: “Hari abantu tubwira kubahiriza amabwiriza ukabona ntabyumva neza, icyo gihe rero ntitumureka, ahubwo tumufasha kubyumva kuko nta muntu udatinya urupfu, tukamubwira ibibi bya Coronavirus, atabyumva tukiyambaza inzego z’umutekano kuko na zo tuba turi kumwe na bo”
Umunyamabanga Nshingwabikorwa w’Umurenge wa Kiramuruzi Yankurije Véstine, ashima uruhare rw’uru rubyiruko mu kurwanya Covid 19.
Ati: “Uru rubyiruko rw’abakorerabushake mu murenge wacu rwaradufashije cyane mu kurwanya covid 19 kuburyo twibaza tuti iyo baba badahari biba bimeze bite, ni ukuvuga ngo turakorana hafi buri munsi, kandi n’iyo bagize ikibazo hari nk’umuntu wabagoye twitabaza inzego z’isumbuye dukorana na zo urugero nka Police bakadufasha.”
Gitifu Yankurije kandi arasaba abaturage b’uyu murenge gukomeza gufatanya kwirinda kwirinda iki cyorezo bakurikiza amabwiriza.
Mu Murenge wa Kiramuruzi hari urubyiruko rw’abakorerabushake (Youth Volunteers) rugera kuri 40 rufatanya n’Ubuyobozi bw’umurenge, bugakorana na 15 umunsi ku wundi mu bukangurambaga bwo kurwanya Covid-19.
