Mukankurana Patricia, umukecuru wo mu Kagari ka Karenge, Umurenge wa Kabarore, mu Karere ka Gatsibo yagaragaje imbamutima yatewe no kubakirwa inzu no guhabwa ibikoresho byayo, kubakirwa igikoni, ubwogero n’ubwiherero ndetse no gukorerwa akarima k’igikoni n’inkomezabigwi ziri ku rugerero.
Igikorwa cyo gutaha iyi nzu cyabaye kuri uyu wa 5 Nzeri 2023, n’Inzego z’Ubuyobozi zitandukanye mu Karere ka Gatsibo n’intore ziri ku rugerero mu Kagari ka Karenge, aho zakoze ibikorwa bitandukanye birimo kubakira abatishoboye inzu zo kubamo, kububakira ubwiherero, ibikoni ndetse n’ubwogero, kubakorera uturima tw’igikoni bafatanyije n’abaturage ndetse no kubahugura mu ikoranabuhanga.
Uyu mukecuru yavuze ko yishimiye igikorwa izi ntore zagizemo uruhare, ashimira n’ubuyobozi bw’igihugu.
Yagize ati: “Icya mbere mbanje gushimira umubyeyi wacu Paul Kagame n’abandi bayobozi, baduteye inkunga, inzu yari yaranguye hejuru, ndeka mu nzu, mwese ndabashimiye. Imvura yagwaga nkavuga nti: ‘noneho ndapfa’ ariko ndabashimiye.”
Yakomeje avuga ko bamukuye ahantu hakomeye, dore ko imvura yagwaga amazi akamusanga mu nzu, ati: “Imana ishimwe, ubu njyewe nabuze n’icyo navuga; bayobozi bacu, ahantu muri gukura abakecuru, Imana yo mu Ijuru ari yo izajya ibaha umugisha, na gitifu wacu yajyaga kwikorera ibiti akagenda agakora… Yewe, ntabwo yari yicara kuva iyi nzu yatangira kubakwa, n’uru rubyiruko rwacu.”
Umuyobozi w’Umurenge wa Kabarore nawe wari uri mu muhango wo gutaha inzu ya Mukankurana Patricia yavuze ko bafatanyije n’intore kubaka iyi nzu, kandi ko ari ibisanzwe ko Abanyarwanda bafashanya, udafite bakamuremera.
Yagize ati: “Twafatanyije n’izi ntore mu kubaka iyi nzu, ni muri urwo rwego twaje kuyitaha, ariko nk’uko mu Muco Nyarwanda dusanzwe tubizi, Umunyarwanda muzima, iyo abona mugenzi we hari aho adafite ubushobozi, akora ku byo atunze akamuremera. Ni iyo mpamvu hari ababyeyi bafite ibiseke birimo agapfundikiye birumvikana, birimo imbuto, imboga, n’ibindi kugira ngo uyu mubyeyi, iyi nzu agiye gutaha, azabe afite n’ibyo ayiriramo.”
Umuyobozi w’Akarere ka Gatsibo wungirije ushinzwe Imibereho Myiza y’Abaturage, Mukamana Marceline yashimiye izi ntore ziri ku rugerero ku bikorwa byiza ziri gukora bizamura iterambere ry’Akarere.
Yagize ati: “Turashimira izi ntore ziri ku rugerero ku bw’ibikorwa byinshi bakoze; kugira ngo byumvikane neza, bagize uruhare mu kubaka iyi nzu ku bufatanye n’abaturage n’ibindi bikorwa bitandukanye.”
Ibi bikorwa byo kubaka inzu, ibikoni, ubwiherero n’ubwogero, gukora uturima tw’igikoni n’ibindi birimo na Gahunda ya ‘Byikorere’ ku Irembo, bifasha akarere kuzamura imibereho myiza y’abaturage no kubageza ku iterambere, bigizwemo uruhare n’Intore z’Inkomezabigwi.
