Perezida w’Inama Njyanama y’Akarere ka Gatsibo, Sibomana Saidi, yemereye Abanyamabanga Nshingwabikorwa b’imirenge ko uzaba uwa mbere mu kwesa imihigo ibiri ikirimo imbogamizi ijyanye no kubakira abatishoboye, azamugabira inka we bwite
Ibi yabigarutseho mu nama nyunguranabitekerezo yabaye kuri uyu wa Kabiri tariki 25 Mutarama, ihuza abayobozi b’amashami , Abanyamabanga Nshingwabikorwa b’imirenge n’abandi bakozi n’abafatanyabikorwa batandukanye bareberaga hamwe uko icyiciro cya mbere cy’imihigo cyagenze n’ibikwiriye gukorwa ngo igende neza.
Muri iyi nama basanze imihigo 99 yahizwe, imyinshi imaze kweswa 100% indi yo ikaba yarahawe umurongo ku buryo hari icyizere ko na yo izeswa 100%.
Imihigo basanze ikiri inyuma ni ibiri, irimo umuhigo wo kubakira imiryango itishoboye inzu ndetse n’umuhigo wo gusana inzu zitajyanye n’igihe muri buri murenge. Iyio mihigo yombi ngo ni imwe mu yo babona ishobora kuzabasubiza inyuma igatuma bataza mu myanya y’imbere mu kwesa imihigo.
Perezida w’Inama Njyanama y’Akarere ka Gatsibo, Sibomana Saidi yasabye aba bayobozi kwifashisha abafatanyabikorwa batandukanye bari mu mirenge bayobora mu kwesa iyi mihigo, ababwira ko uzatanga abandi mu kuyesa azamugabira inka ku giti cye
Ati: “Inka nzayitanga ku mufuka wanjye kandi ndabyemeye, mugende mukore rwose uzabasha kwesa iyi mihigo bwa mbere nzayimuha; mbyemereye mu ruhame.”
Uyu muyobozi yavuze ko inka ayemereye aba bayobozi koko, uzabasha kwesa iyi mihigo azayimuha ngo kuko ni imihigo ikomeye kandi ibaraje inshinga.
Ati: “Ni umuhigo wari watunaniye tubona yadusubiza inyuma kandi bose banyemereye ko bagiye kubikora.”
Akarere ka Gatsibo kahize imihigo 99 nubwo hamaze gushira igihembwe cya mbere, Ubuyobozi buvuga ko bwishimira intambwe bamaze gutera mu kuyishyira mu bikorwa.
Ubuyobozi bw’Akarere ka Gatsibo bugaragaza ko gusuzuma aho imihigo igeze ishyirwa mu bikorwa, bidasigana no gusesengura niba koko ibyakozwe bifasha umuturage bigahindura imibereho ye mu buryo bw’iterambere ry’imibereho myiza, ubukungu, guhabwa serivisi nziza kandi vuba; no kubaho mu ituze n’umutekano.
