Bamwe mu baturage bakora akazi ko gutunganya kawa mu nganda zitandukanye mu Karere ka Gatsibo bavuga ko kawa imaze kubageza kuri byinshi kuko bayibonyemo akazi.
Aba baturage bavuga ko kuba muri aka karere no mu mirenge batuyemo haba igihingwa cya kawa, ari amahirwe barusha abandi kuko yatumye babona akazi bakava mu bushomeri.
Bamwe mu baganiriye na MUHAZIYACU bavuze ko bishimira ko babonye aho gukorera bakabona uko biteza imbere ibi bavuga ko babikesha igihingwa cya kawa.
Uwitwa uwimbazi Agnes wo mu Murenge wa Kageyo mu Kagari ka Gituza yagize ati: “Izi nganda ntabwo zabura akamaro zitumarira kuko akenshi mu rubyiruko zirwanya kuba abashomeri, kuko dukoramo tukabasha kuba twagira icyo twiha.”
Yakomeje agira ati: “Ntabwo amafaranga aba ari menshi cyane ariko umuntu ashobora kuba yagura itungo nko mu mezi abiri; nk’ubu njye narariguze rirahari.”
Umuyobozi w’Akarere ka Gatsibo wungirije ushinzwe iterambere ry’ubukungu Sekanyange Jean Leonard yavuze ko kawa ifitiye akamaro abaturage b’Akarere kandi hari gahunda yo kuyongera.
Yagize ati: “Mu karere kacu kawa yamaze kuba ikirango cyacu kuko mu gihugu hose iyo bavuze kawa bumva Gatsibo, kandi ikaba ari kawa nziza ifitiye akamaro abaturage bacu, baba abayihinga ndetse n’abandi, kandi ikunzwe ku isoko haba mu Rwanda no hanze.”
Yasoje agira ati: “Kugira ngo rero ibyo tubigereho ni uko tuba twubahirije amabwiriza yose yashyizweho na NAEB y’uburyo kawa igomba guhingwa ikitabwaho kugeza uko igomba gusarurwa.”
Ubuyobozi bw’Akarere ka Gatsibo buvuga ko nubwo hari ibindi bahinga, bashaka ko mu mirenge yose igize aka karere bakongera umusaruro wa kawa n’ubuso ihingwaho, nibura bakazagira miliyoni 30 z’ibiti mu karere kose, mu gihe ubu hari ibiti miliyoni 10.4.
Ubu mu Karere ka Gatsibo haba inganda 19 zitunganyirizwamo umusaruro wa kawa zikoramo abaturage b’ingeri zose. Muri aka karere bakaba bateganya kongera iki kihingwa ku buryo mu myaka itatu iri imbere kizajya cyinjiza asaga miliyari 45 mu gihe ubu cyinjiza miliyari ziri hagati ya 12 na 15 ku mwaka.
