Umuyobozi wa FPR-Inkotanyi mu Karere ka Gatsibo Gasana Richard yasabye urubyiruko gukoresha ikoranabuhanga bavuga ibyiza by’u Rwanda n’ibyiza by’umuryango FPR Inkotanyi ndetse banavuguruza ibibi bivugwa ku gihugu.
Ibi yabigarutseho kuri iki cy’umweru tariki ya 19 Gashyantare, mu nteko rusange y’Urugaga rw’urubyiruko rushamikiye ku muryango FPR Inkotanyi yabereye ku cyicaro cy’umuryango gihereye mu Murenge wa Kabarore, aho inyigisho zahatangiwe zibanze ku mateka y’umuryango FPR inkotanyi.
Mu butumwa yatanze yagarutse ku mateka yaranze igihugu anashishikariza urubyiruko gukoresha ikoranabuhanga, bamenyekanisha ibyiza by’u Rwanda no kuvuguruza amakuru atari yo ku bavuga nabi u Rwanda .
Yagize ati: “Intambara yo mu itangazamakuru nirwo rugamba ruriho rukomeye ku isi, si n’intambara kandi ni ukugaragaza ukuri ku birimo kuba cyangwa kuvuguruza ibitari ukuri , turasabwa rero nk’urubyiruko guhaguruka tugakoresha ikoranabuhanga kandi rirahari mujye kuri Facebook, Twitter , YouTube n’ahandi.”
Yakomeje agira ati: “Uruhare rw’urubyiruko mu kugaragaza ibyiza rurakenewe muri abantu bakuru ntabwo muhejwe muri politiki y’Igihugu cyanyu ni uburenganzira n’inshingano zawe kumenya ibirimo kubera mu gihugu, dufite kuvuga amateka yacu nta muntu uzaza kutuvugira ibyacu.”
Bamwe mu rubyiruko baganiriye na MUHAZIYACU bavuze ko bagiye gushyira imbaraga mu gukoresha ikoranabuhanga bavuga ibyiza by’igihugu no kuvuguruza amakuru atariyo avugwa ku Rwanda .
Ndacyayisenga wo mu Murenge wa Kageyo yagize ati: “Hari bimwe twazikoreshaga ariko hari ibyo batwibukije nk’izo mbogamizi z’abantu bakoresha ikoranabuhanga basebya u Rwanda, tugiye kujya tuzikoresha tugaragaza ibyiza tubavuguruza ku byo bavuga bitari byo.”
Ntakirutimana Alafat wo mu Murenge wa Gatsibo nawe yagize ati :” Twakoreshaga ikoranabuhanga twigaragaza ubwacu ariko ntitugaragaze ibyiza by’igihugu cyacu, akenshi kuko tuba tutabigize nk’akazi kacu ka buri munsi, ariko dukuyemo inyigisho zitari nkeya.”
Yongeye ati: “Umuntu ashobora gushyira ikintu kibi ku mbuga nkoranyambaga ukamubwira uti ibi sibyo.”
Chairman Gasana yavuze ko inteko rusange y’urugaga rw’urubyiriko rushamikiye ku miryango wa FPR inkotanyi yibanze ku mateka kuko ari ingenzi mu kumenya ibigwi n’intego by’umuryango.
Ati: “Amateka ni ikintu gikomeye cyane mu buzima bw’abantu kuko iyo utazi amateka yawe birakugora no kwishakisha, urabanza ukamenya uwo uri we n’aho wavuye.”
Inteko rusange y’urugaga rw’urubyiruko rushamikiye ku muryango FPR Inkotanyi ni inteko iteganywa n’itegeko rishyiraho umuryango wa FPR Inkotanyi ihuza urubyiruko ruhagarariye ibyiciro byose bitandukanye, kugira ngo ruganirizwe ku iterambere ry’igihugu n’uruhare rw’urubyiruko muri iryo terambere hasesengurwa imbogamizi zihari zigashakirwa ibisubizo kugira ngo iryo iterambere rigerweho, no kugira ngo urubyiruko rukure rufite intekerezo z’umuryango.
Iyi ntek ikaba yitabiriwe n’urubyiruko rusaga 1,000.
