Bamwe mu baturage bo mu Karere ka Gatsibo bahinga ibihingwa birimo umuceri, ibigori na soya bavuga ko mu gihe k’ impeshyi bahinga izuba rikabyangiza bakarumbya bitewe n’uko nta mashini zuhira bafite bakwifashisha; bakaba bifuza guhabwa ubufasha bakagura imashini zuhira umusaruro ukiyongera.
MUHAZIYACU yaganiriye na bamwe mu baturage babikomozaho bavuga ko nubwo bahinga ku rwego rwo hejuru hari igihe umusaruro ugabanuka kubera izuba ryavuye igihe kirekire bagasarura ku kigero cyo hasi.
Uwitwa Mukabutare Théopiste yagize ati: “Duhinga soya n’ibigori ariko ingorane duhura na zo ni ikirere, duhinga ku misozi mu gihe k’izuba duhura n’ ikibazo cyo kurumbya bitewe n’uko nta mashini zuhira dufite tukaba twifuza ko twahabwa ubufasha tukabasha kuzigura”.
Uwitwa Zirimwabagabo utuye mu murenge wa Kiziguro na we yagize ati: “Duhura n’ ibibazo by’ibihe kandi amazi ari makeya, tubonye imashini zuhira byibura byafasha gukemuka byibura mu gihe nta mashini dufite, bakajya baduha imbuto ku gihe”.
Sekanyange Jean Leonald Umuyobozi w’Akarere ka Gatsibo wungirije ushinzwe iterambere ry’ ubukungu avuga ko hari imishinga ifasha abahinzi n’aborozi hejuru ya 50% na 75% kubona inkunga bakeneye cyane cyane abifuza imashini zuhira.
Yagize ati: “Hari amahirwe ahari mu karere kacu ndetse n’ igihugu muri rusange kuko hari imishinga ihari yunganira abahinzi n’aborozi cyane cyane abashaka imashini zuhira baba abikorera ku giti cyabo cyangwa muri Koperative ukora umushinga ukawujyana ikakunganira ukabasha kugura imishini yo kuhira ubuzima bugakomeza nubwo imvura yaba itagwa, aya mahirwe rero mujye muyamenya kandi muyabyaze umusaruro.”
Yakomeje avuga ko kuri ubu hari abamaze gusubirizwa ubusabe bwabo batanze mu mushinga witwa CDAT, gusa ashishikariza abahinzi kwibumbira mu makoperative kugira ngo amakuru ajye abagereraho ku gihe.
Ati: “Ubu dufite n’abemerewe bagiye kuzahabwa inkunga bagera kuri 38 mu karere kacu ndetse bakazahabwa inkunga ifite agaciro k’amafaranga y’u Rwanda asaga miliyari. Nabashishikariza kwitabira kwibumbira hamwe mu makoperative kuko nibwo bamenya amakuru agezweho ndetse na ya nkunga bikaborohera kuyibona.”
Umushinga SAIP(Sustainable agriculture intensification and food security) ni umwe mu mishinga yunganira abahinzi n’ aborozi ukorera mu karere ka Gatsibo.Mu yindi mishinga ihari twavuga RDDP na CDAT nayo itanga inkunga ku bahinzi n’aborozi.
