Ikipe ya Etoile de l’Est yo mu cyiciro cya kabiri cya shampiyona y’umupira w’amaguru mu Rwanda yasinyishije Twagizimana Fabrice uzwi ku izina rya “Ndikukazi”.
Ubuyobozi bw’ikipe ya Etoile de l’Est FC bwatangaje ko bwahaye amasezerano y’umwaka uyu mukinnyi wahoze ari kapiteni w’ikipe ya Police FC. Aya masezerano azarangirana n’umwaka w’imikino wa 2020-2021.
Twagizimana Fabrice “Ndukukazi” ni myugariro wo hagati (Central defender) akaba anakina nk’umukinnyi wo hagati wugarira (defending midfielder).
Byukusenge Elia, umunyamabanga mukuru w’iyi kipe yo mu Karere ka Ngoma, yabwiye MUHAZIYACU ko uyu mukinnyi wasinyishijwe azafasha kongera umwuka mwiza ndetse n’intsinzi mu ikipe.
Yagize ati: “Ni umukinnyi ufite inararibonye kandi mu mikino ya ‘playoffs’ abakinnyi nk’aba baba bakenewe kuko ni imikino itera ubwoba abakinnyi bakiri bato; ariko iyo wongeyemo umuntu mukuru nk’uyu atuma abandi abakinnyi bato basanzwemo bagira ‘morale’.”
Byukusenge yongeye agira ati: “Ikindi kandi gusinyisha uyu mukinnyi ni inyongera nziza mu bwugarizi bwacu dushingiye ku kuba yarakinnye mu makipe akomeye akanakinira amavubi.”
Uyu muyobozi mu ikipe ya Etoile de l’Est kandi yavuze ko bateganya kugura undi mukinnyi umwe muri iyi mpeshyi.
