Binyuze mu gikorwa cy’umuganda usoza ukwezi kwa Gashyantare, abaturage b’Umurenge wa Mayange bakoranye n’Abajyanama mu nama Njyanama y’Akarere ka Bugesera, bisaniye umuhanda w’umugenderano ureshya na kirometero enye (4), wongera kuba nyabagendwa nyuma y’igihe kirekire warangiritse.
Umuganda wo gusana uyu muhanda wabaye kuri uyu wa Gatandatu tariki 22 Gashyantare 2025, uhuzwa no kutangiza Icyumweru cy’Umujyanama mu Karere ka Bugesera, aho abajyanama b’Akarere bifatanyije n’abaturage muri uwo muganda.
Abaturage bishyimiye ko uyu muhanda wongeye kuba nyabagenda, nk’uko Muturende Phelomene utuye mu kagari ka Gakamba abigarukaho, ati: “Twabyakiriye neza cyane kubona inzego z’akarere zose zimanuka bakaza gukorana natwe umuganda, kandi twishimye kubera ko twakoranye n’abayobozi bacu uyu muhanda wacu. Rero uyu muganda wagize akamaro kanini cyane kuko wari ufite ibinogo byinshi n’imodoka zacagamo zigaheramo.”
Zimurinda Jean Pierre wo mu Kagari ka Kagenge na we yagize ati: “Twishimiye ko igikorwa cy’umuganda cyateguwe neza kikaba kitugiriye akamaro kanini, kuko uyu muhanda wari warangiritse ariko Akarere kazanye imbaraga turafatanya tubona twongeye kubona umuhanda wacu ari nyabagendawa, kandi batwijeje ko bazarushaho kuwukora birambye.”
Umuyobozi w’Akarere ka Bugesera, Mutabazi Richard yashimiye abagize uruhare mu ikorwa ry’uyu muhanda, o
Ati: “Turashimira ubufatanye bw’abaturage n’izindi nzego mu gikorwa cyo gukora umuhanda, ndetse n’abitanze bakazanamo amamodoka n’imashini n’ubundi bumenyi. Turashimira Polisi y’u Rwanda bifatanyije natwe bakazirikana ko umutekano utangirira mu mibereho n’ibituma tubaho neza bigatuma umutekano wacu ugerwaho, kubera ko uyu muhanda ari mubi hakaba habaho impanuka n’ubundi umutekano wacu uba wahungabanye.”
Umuhanda wa Mayange-Gakamba ureshya na kirometero zisaga enye (4) ukaba uhuza utugari twa Kibirizi, Gakamba na Kagenge, ukaba unahura n’umuhanda munini wa kaburimbo Kigali-Nemba; ndetse ukaba umwe mu mihanda ikora ku kibuga cy’indege kiri kubakwa mu Karere ka Bugesera.
