Akarere ka Bugesera karishimira ubushake abaturage bako bafite mu kwitabira serivisi zo kutanga urukingo rwa Covid 19, nyuma y’aho Leta y’u Rwanda yongereye umubare w’inkingo mu mijyi yunganira Kigali, harimo n’Umujyi wa Nyamata w’aka karere.
Mu kiganiro kigufi na MUHAZIYACU, Umuyobozi w’Akarere ka Bugesera Mutabazi Richard yavuze ko umubare w’abitabira serivisi zo gufata urukingo rwa Covid-19 uri ku rwego rutatekerezwaga nyuma y’aho aka karere kongerewe umubare w’inkingo za Covid-19.
Uyu muyobozi yabigarutseho kuri uyu wa Mbere tariki 30 Kanama, nyuma yo gusoza inama yigaga ku kugenzura uko iki gikorwa cyo gutanga urukingo rwa Covid-19 gihagaze mu karere ka Bugesera, bw’umwihariko mu Mujyi wa Nyamata.
Yagize ati: “Twahawe inkigo ibihumbi cumi n’umunani(18000)tugomba gukingira, cyane cyane abantu bari mu bucuruzi, mu masoko, mu gakiriro, abanyonzi, abamotari n’abandi. Twarebaga uko icyo gikorwa cyagenze kuko dukingiye inkingo nyinshi cyane 18, 000 mu minsi itatu. Ni igikorwa kinini cyane, twarimo tureba rero amasomo tuvanyemo, uko byagoranye, ibyiza, n’ibyo twakubakiraho n’ubutaha.”
Meya Mutabazi avuga ko mu bugenzuzi bwakozwe n’Akarere ka Bugesera muri iki gikorwa cyo gutanga inkingo za Covid-19, byagaragaye ko abaturage bo muri aka karere bashaka inkingo cyane.
Yakomeje agira ati: “Birasaba rero ko tuzajya dufata igihe tugateguza icyiciro kigomba kuza gukingirwa, tukabararika, tukabaha amatangazo, tunakumira abatari muri ibyo byiciro kugira ngo niba twavuze ngo turakingira abantu bafite imyaka 45; utayifite yekwirirwa aza. Niba twavuze ngo uyu munsi turakingira abacuruzi, umuganga, umwarimu yekuza.”
Ubuyobozi bw’aka karere kandi buteganya gutegura ahantu hanini ndetse no gutegura abashinzwe umutekano hamwe n’urubyiruko rw’abakorerabushake muri iki gikorwa, bitewe n’umubare munini w’abifuza gufata urukingo biryo ntibibe intandaro yo gukingira abantu benshi nyamara hari n’abandi bahanduriye icyo cyorezo.
Kugeza ubu mu Rwanda abamaze guhabwa urukingo rwa Covid-19 basaga miliyoni n’ibihumbi magana atanu, bamaze guhabwa Dose ya mbere, naho abamaze gufata dose ebyiri basaga 631,500.
