Mu gikorwa cyo gukingira abaturage urukingo rwa Covid-19 mu Karere ka Bugesera, by’umwihariko mu Mujyi wa Nyamata, mu minsi ibiri, ku wa Gatandatu n’ejo hashize ku wa Mbere abagera ku 1,104 bahawe urukingo rwa kabiri.
Ubwo MUHAZIYACU yaganiraga na bamwe mu baturage bo mu Murenge wa Nyamata kuri site iri gukorerwaho iki gikorwa kuri Sitade y’Akarere ka Bugesera, bavuze ko bishimiye iki gikorwa cyo kufata urukingo rwa kabiri kuko ari ngombwa kandi ko bashimira Abuyobozi bakuru bw’Igihugu ku mbaraga bashyira mu gushakira ubuzima bwiza umuturage.
Uwimana Adella wo mu Kagari ka Nyamata, Umudugudu wa Gasenga I, yavuze ko bakiriwe neza muri iyi gahunda kandi ko babyishimiye, kandi ko kuba akingiwe urukingo rwa kabiri ari narwo rwa nyuma, bidakuraho gukomeza ingamba zo kwiringa icyorezo.
Ati: “Uru rukingo ni urudufasha kugira ngo icyorezo nikiza ntigihite kiduhitana, ariko n’ubundi agapfukamunwa ntabwo twagakuramo, tugomba gukomeza gukaraba intoki, tugakomeza isuku. Nubwo dukingiwe ntabwo ari ukuvuga ngo tuzirara.”
Mugenzi we Nyirabagesera Joselyne na we wo mu Kagari ka Nyamata, mu Mugugudu wa Gasenga II, ashimira Leta y’u Rwanda itekereza ku buzima n’imibereho y’umuturage cyane cyane muri gahunda yo gushakira Abaturarwanda inkingo za Covid-19 muri ibi bihe.
Yagize ati: “Twaje kwikingiza urukingo rwa kabiri. Ndashimira Umukuru w’Igihugu cyacu ukomeza kuturebera; agakomeza kudushakira ibyatugirira umumaro. Kandi ndashimira n’abayobozi bacu b’inzego zindi ko bakomeza kureberera, bakadushishikariza kwikingira. Iki cyorezo cya Covid, ni icyorezo cyaje gitunguranye, ariko ubuyobozi bwacu bwabigizemo uruhare mu kugira ngo tujye tugira ubwirinzi.”
Barihenda Jean Pierre na we utuye i Nyamata yavuze ko byari ngombwa ko aza gufata urukingo rwa kabiri, na we agaruka kuri gahunda yo gukomeza gukurikiza amabwiriza yo kwirinda icyorezo.
Ati: “Naje kwiteza urukingo rwa kabiri; kuko ari ngombwa kandi ni n’ingirakamaro. Ntabwo bivuze ko ubwirinzi buhagarara. Ni ukuvuga ngo kwirinda biruta kwivuza. Igikorwa kiri kugenda neza, n’abayobozi bari kubikora neza ahubwo nkaba nshishikariza n’abandi kuza gukora igikorwa nk’iki ng’iki bakikingiza.”
Umunyamabanga Nshingwabikorwa w’Umurenge wa Nyamata, Mushenyi Innocent avuga ko muri iyi gahunda yo gutanga inkingo nta kibazo babonamo kuko abaturage bari kwitabira ku kigero gishimishaje.
Uyu muyobozi avuga ko kandi bafite umwirondoro w’abagomba gukingirwa bityo ko babakurikirana ku buryo buboroheye.
Yagize ati: “Nk’uko mubibona abaturage barimo kwitabira. Turateganya gukingira abaturage 2,144 ari nabo bafashe urukingo rwa mbere, ubu tukaba tugeze ku baturage magana arindwi, turizera ko abikingije urukingo rwa mbere bazaza gufata urukingo rwa kabiri.”
Iyi gahunda yo gukingira urukingo rwa kabiri ikaba yaratangiye kuwa Gatandatu tariki ya 11 Nzeri ikongera gusubukurwa kuri uyu wa mbere tariki ya 13 Nzeri muri uyu murenge wa Nyamata ukaba n’umujyi w’Akarere ka Bugesera.
Mu mibare iheruka, igaragaza ko mu Karere ka Bugesera abamaze kubona inkingo basatira 40,000 naho abari bamaze kubona Dose zombi bari 11,149.
