Abagize komite z’imirenge zishinzwe imicungire y’ibiza mu Karere ka Bugesera batangiye amahugurwa agamije gukarishya ubumenyi mu micungire y’ibiza no kurebera hamwe uburyo bwo kugabanya ingaruka ziterwa n’ibiza, harimo kubaka no gusana ibiramba.
Ni amahungurwa y’iminsi ibiri yatangiye kuri uyu wa gatanu tariki ya 16 Nzeri 2022, afunguwe n’Umuyobozi w’Akarere ka Bugesera Mutabazi Richard wasabye abitabiriye aya mahugurwa kumenya kwitegura ibiza mugihe bije.
Aganira na MUHAZIYACU Meya Mutabazi yavuze ko aya mahugurwa agamije kongerera ubumenyi abagize Komite 15 zishizwe imicungire y’ibiza mu mirenge.
Yagize ati: “Turimo kureba mu by’ukuri kugira ubumenyi ku bijyanye n’ibiza, kwitegura uko twakwitwara mugihe twaba tugize ibiza, uko twakora ubutabazi twifashishije amatsinda abishinzwe no kumenya aho twakura ibikoresho, no gusesengura uburyo ahabaye ibiza twakoze n’ubutabazi, twajya dushyiraho gahunda yo gusana kugira ngo dusubiranye ibyangiritse hanyuma twongere dutegure twirinde cya kiza cyatubayeho, cyangwa se dufate ingamba kugira ngo icyo tudafiteho ubushobozi nikinaza kitatugiraho ingaruka zikomeye.”
Uwamugira Martha ni Umunyamabanga Nshingwabikorwa w’Umurenge wa Ntarama, ari mu bitabiriye aya mahugurwa akaba anahagarariye komite ishinzwe kurwanya ibiza muri uyu murenge, avuga ko amahugurwa nk’aya bayitezeho kungukiramo ubumenyi bwiyongera ku bwo bari basanganywe, bikaba bizabafasha kongera gukangurira abaturage gukumira ibiza.
Ati: “Aya mahugurwa twitezemo ko tugiye kungukiramo ubumenyi bwiyongera ku bwo twari dufite ku kurwanya ibiza, kandi tukaba tuzajya guhugura n’abaturage tuyobora bo muri Ntarama, aho tugomba kubasobanurira uko bakumira ibiza ndetse nuko bakwitwara mu gihe byaba bibabayeho.”
Agaragaza ishusho rusange y’ibikorwa byo kwirinda no gukumira ibiza, Umukozi muri Minisiteri yo kurwanya ibiza (MINEMA), Nyiransabimana Fernande yagaragaje ko imicungire y’ibiza ari gahunda ikwiye guhoraho mu nzego zose.
Yagize ati: “Imicungire y’ibiza ni ibikorwa bigomba kuba bihoraho mu nzego zitandukanye bijyanye no kwirinda Ibiza, gukumira no kwitegura mbere y’uko biba, guhangana na byo mu gihe byabaye, gusana ugasubiza mu buzima busanzwe ibyangijwe n’ibiza.”
Ibiza bikunze kwibasira u Rwanda ni imvura nyinshi, inkubi y’umuyaga, imyuzure, inkangu n’ikuba. Imibare itangwa na Banki y’Isi igaragaza ko idolari rimwe (1$) rishyizwe mu bikorwa byo gukumira ibiza rirengera amadolari arindwi (7$) yakabaye yifashishwa mu bikorwa by’ubutabazi no gusana ibyangijwe n’ibiza.
