Itsinda riturutse mu bwami bwa Lesotho riyobowe na Minisitiri w’Intebe Wungirije muri iki gihugu ryaje kwigira ku Rwanda uburyo ubuyobozi bw’inzego zibanze bukorana n’abafatanyabikorwa muri gahunda zigamije guteza imbere imibereho myiza y’abaturage no kubafasha kuzamura ubukungu.
Mu rugendoshuri bagiriye mu Karere ka Bugesera kuri uyu wa Kane tariki 24 Ukwakira 2024, baherekejwe n’Umuyobozi w’Akarere ka Bugesera, Mutabazi Richard basuye ikigo cya Fondasiyo Gasore Serge mu rwego rwo kureba uko bakora ibikorwa bigamije kuzamura imibereho y’abaturage.
Nyuma yo gusura no gusobanurirwa bimwe mu bihakorerwa birimo amashuri, ikibuga cy’amagare ndetse n’ahacumbikirwa ikipe y’Akarere y’abakobwa batwara amagare, Minisitiri w’Intebe Wungirije wa Lesotho, Nthomeng Majara, yagaragaje ko u Rwanda rumaze gutera intambwe ishimishije mu guteza imbere imibereho y’abaturage, ashima uburyo abafatanyabikorwa b’Akarere bagira uruhare mu bikorwa bizamura iterambere ry’abaturage.
Ati: “Nishimiye kubona uburyo inzego z’ibanze zifatanya n’abafatanyabikorwa batandukanye mu rwego rwo gushaka ibisubizo by’ibibazo bikibangamiye imibereho myiza y’abaturage. Ni intabwe nziza yo kwigira ku miyoborere myiza y’igihugu cy’u Rwanda.”
Uwamahoro Innocente uyobora ikigo Fondasiyo Gasore Serge yasobanuriye abanya- Lesotho ko ibikorwa bikorerwa muri iki kigo biba bigamije guhindura imibereho y’abaturage mu buryo bw’ubukungu n’imibereho.
Umuyobozo w’Akarere ka Bugesera, Mutabazi Richard yashimiye iri tsinda riturutse mu bwami bwa Lesotho kuba bahisemo gusura Akarere ka Bugesera no kukigiraho ku mikorere n’imikoranire hagati yako n’abafatanyabikorwa baho. Yabagaragarije kandi uruhare rw’abafatanyabikorwa mu iterambere ry’abaturage.
U Rwanda na Lesotho byatangiye kugirana umubano mu 1983, ukaba ushingiye ku gusurana n’amasezerano y’imikoranire itandukanye yasinywe ku mpande zombi.
Ku itariki ya 4 Ukwakira 2024, Minisitiri w’Intebe Dr. Edouard Ngirente, yahagarariye Perezida wa Repubulika Paul Kagame, mu muhango wo kwizihiza imyaka 200 Ubwami bwa Lesotho bwari bumaze bubayeho, n’imyaka 58 bumaze bubonye ubwigenge.
Mu 2013, u Rwanda na Lesotho byasinye amasezerano y’ubufatanye agamije kujya ibihugu byombi bihana amakuru n’ubumenyi bijyanye no guteza imbere imiyoborere myiza.
Muri Kanama 2021, Polisi y’u Rwanda n’iya Lesotho basinyanye amasezerano y’ubufatanye mu bintu bitandukanye, akubiyemo ibijyanye n’ubufatanye mu kurwanya ibyaha nk’iterabwoba, ikwirakwira ry’ibiyobyabwenge, kurwanya ibyaha byambukiranya imipaka harimo ibijyanye no kubaka ubushobozi bwa Polisi zombi no gusangira amakuru n’ubundi bunararibonye mu by’umutekano.
Muri aya masezerano harimo ibijyanye no guhanahana amahugurwa, gufatanya mu bikorwa bya za Polisi, gusangira porogaramu zijyanye no kugenza ibyaha n’uburyo bwo kubika amakuru ajyanye na byo, kurwanya ikwirakwira ry’intwaro no guhanahana amakuru ku gihe, ajyanye n’ibyaha n’abanyabyaha.
