Mu rwego rwo kubungabunga no kwita ku bana n’urubyiruko bari mu biruhuko, abana bagera kuri 576 baturutse mu mirenge inyuranye y’Akarere ka Bugesera, basoje ingando z’iminsi umunani (8) bakoreraga mu Murenge wa Ntarama zari zigamije kubigisha siporo n’indangagaciro z’umuco Nyarwanda bari hamwe.
Iki gikorwa cyakozwe ku bufatanye bw’Umuryango Gasore Serge Faundation n’Akarere ka Bugesera hagamijwe gufasha aba bana gukurikirana izo nyigisho bitabwaho mu buryo bwihariye.
Muri izi ngando, habereyemo amarushanwa y’umukino wo kwiruka n’indi mikino itandukanye ndetse n’ibikorwa bigamije kwigisha abana kurangwa n’urukundo.
Bamwe mu babyeyi bafite abana bitabiriye ingando bashimiye ubuyobozi bwateguye iki gikorwa ngo kuko byafashije abana babo kubarinda ubuzererezi mu biruhuko ahubwo bahigira byinshi.
Mukamurenzi Yvonne, ni umubyeyi ufite abana bafashijwe kwitabira izi ngando ndetse akaba yarahawe umuriro uturuka ku mirasire y’izuba, binyuze muri gahunda yo kwigisha abana kugira indangagaciro zo gufasha. Uyu mubyeyi ashima iyi gahunda yo guhuriza abana hamwe bakigishwa ibintu bitandukanye.
Ati: “Ibikorwa nk’ibi ni byiza kuko bifasha abana bacu kwiga ubundi bumenyi bwabafasha mu mibereho igendanye no kubana neza, gukorera hamwe n’ibindi byiza bigiye hano muri Fondasiyo Gasore Serge. Rero ndanashimira igikorwa cyo kumpa umurasire nzajya ncana kandi byanyeretse urukundo.”
Umukozi w’Umuryango Gasore Serge ushinzwe gukurikirana gahunda z’ingando z’abana bakoreye muri iki kigo, avuga ko guhuriza hamwe aba bana ndetse n’urubyiruko bigamije kubigisha siporo ndetse n’indangacaciro z’umuco Nyarwanda.
Ati: “Iki gikorwa rero gikorwa mu rwego rwo gutoza abana umuco wo gukora siporo mu biruhuko ariko kandi biba binagamije kubarinda ibintu bishobora kubajyana mu ngeso mbi cyangwa kubangiza mu bundi buryo. Rero abana dufasha kwitabira izi ngando ni abana bava mu miryango itishoboye kugira ngo tubafashe kubitaho; no kubaha izo nyigisho ariko kandi tukanabitaho mu buryo bw’imibereho muri iyo minsi umunani (8) bamaze hano.”
Umukozi ushinzwe uburezi mu Murenge wa Ntarama, Musoni Godfroid, yasabye abana guha agaciro uburezi n’imikino, asaba kandi n’ababyeyi kurushaho gushyigikira abana babo.
Ati: “Abana bakwiye guha agaciro uburezi ndetse no kwita ku mikino kuko ituma bazamura impano zabo bakagira n’ubuzima bwiza buturutse mu gukora siporo n’indi myitozo ngororamubiri. Turasaba kandi ababyeyi kwita ku bana bakabafasha muri gahunda zabo z’imyigire no mu yindi mibereyo y’abana ya buri munsi.”
Mu isiganwa ryasoje ingando z’iminsi umunani zaberaga mu Murenge wa Ntarama, ryahuje abakinnyi b’ingeri zose mu byiciro by’imyaka itandukanye: Abari munsi y’imyaka 11 (U-11) birutse ibirometero 2 (2km), abari munsi y’imyaka 16 (U-16) biruka ibilometero 3 (3km), abari munsi y’imyaka 20 (U-20) biruka ibirometero 4 (4km) abafite imyaka 20 kuzamura (20+) biruka ibirometero 5 (5km).
Abana bahize abandi kandi bahawe ibihembo bitandukanye, birimo ibikoresho by’ishuri, ibikoresho by’isuku n’ibindi bihembo binyuranye ndetse banahabwa n’ibyemezo by’ishimwe ko bitabiriye ingando mu gihe cy’iminsi 8 bari hamwe.
