Urubyiruko rwo mu Karere ka Gatsibo mu Murenge wa Kabarore, rwagiriwe inama n’ubuyobozi bw’aka karere yo kwishyira hamwe bagashinga koperative ihinga imbuto, none barishimira ko bageze ku ruganda rwitwa Ingenzi, rufite agaciro ka miliyoni zisaga 200 Frw.
Uruganda bashinze rutunganya umutobe uvuye mu musaruro w’imbuto nk’inanasi, imyembe n’amatunda.
Uko igitekerezo cyo gushinga uruganda cyaje
Mu mwaka wa 2016 urubyiruko rugize iyi koperative yitwa Ingenzi, rwari rufite akazi mu yindi koperative yaje gusenyuka yitwaga Intambwe, yari ifite umushinga wo guhinga imboga n’imbuto zikajyanwa ku isoko. Kubera ikibazo cy’imiyoborere, iyo koperative yagize yatangiye kudahemba neza abari abakozi bayo, barimo n’uru rubyiruko.
Baje kugana inzira y’ubutabera ngo barenganurwe bageze ku rwego rw’akarere, ubuyobozi bubasaba guhagarika gusiragira mu manza ahubwo bakajya gukora ibisa n’ibyo bakoraga muri iyo koperative, nkuko bisobanurwa na Nsabimana Theoneste, Umuyobozi wa Koperative Ingenzi irimo n’uru ruganda.
Ati: “Ubuyobozi bw’akarere bwadusabye guhagarika gukomeza kurega ahubwo tukajya gukomeza umushinga usa n’ibyo twakoraga ndetse batwemerera ko bazaduha inkunga. Icyo gihe twatangije amafaranga y’u Rwanda ibihumbi 60.”
Bigeze mu mwaka wa 2018, abari bagize iri tsinda uko bari 16, biyemeje gushaka ibyangombwa bibemerera gushinga uruganda rutunganya umutobe ukomoka ku mbuto, muri uwo mwaka baje kubibona niko kugura ikibanza bashinga uruganda.
Theoneste akomeza agaragaza ko rwari urugendo rutoroshye. Ati” Ni urugendo rwari rugoye kubera ko bamwe mubo twatangiranye bagiye bagenda hakaza abandi, nabo bakagenda hakaza abandi. Twarwanye intambara ikomeye.”
Theoneste yemeza ko uru ruganda rumaze guhindura ubuzima bwa benshi muri sosiyete, ku buryo hirya no bino muri aka karere hatangiye gushingwa amakoperative mato ahinga imbuto zo kugemura kuri uru ruganda.
Agira ati: “Muri sosiyete ubuzima bw’abantu bwatangiye guhinduka, urugero mu Murenge wa Kiziguro hari urubyiruko ruhinga imyembe, twasanze bakora ariko batagira isoko bikagera nubwo umusaruro wabo wangirika ariko ubu dufitanye nabo amasezerano, umusaruro wabo nitwe tuwugura, nabo byabahinduriye ubuzima.”
Avuga ko nubwo bwose barimo bashaka gutera imbere kurushaho, ariko bahura n’imbogamizi nyinshi zirimo n’izindagurika ry’ikirere kuko nko mu gihe cy’izuba babura umusaruro.
Si ukugura umusaruro gusa bituma imibereho y’abaturage ihinduka, ahubwo bafite urubyiruko rwiganjemo abafite ubumuga butandukanye, bigisha gukora umutobe w’imbuto, abandi bagahabwa akazi muri uru ruganda.
Uru ruganda rwa Koperative Ingenzi, rutunganya umutobe w’imbuto, rwakira nibura toni imwe na 800 z’imbuto mu cyumweru. Kuri ubu rugeze ku gaciro ka miliyoni zirenga 200 Frw.
Abagize iyi Koperative Ingenzi, bashimira ubuyobozi bw’akarere ka Gatsibo bwabagiriye inama yo guhagarika kujya mu manza bakagana inzira yo kwikorera.
