Mu gihembwe cy’ihinga 2025A, Akarere ka Nyagatare gateganya kubona umusaruro mbumbe w’ubuhinzi ungana na toni 173,083. Uyu musaruro ukazaturuka mu bihingwa by’ibanze birimo ibigori, umuceri, ibishyimbo, imyumbati, na soya; bifite uruhare rukomeye mu iterambere ry’ubukungu bw’Akarere.
Ibigori bifatwa nk’igihingwa ngengabukungu mu Karere ka Nyagatare kubera uruhare bifite mu kwihaza mu biribwa no gutanga umusaruro ku isoko ry’imbere mu Gihugu, hari hateganyijwe kubihinga ku buso bungana na hegitari 27,500, ariko buza kwiyongera bugera kuri hegitari 29,067.1, hakaba hateganywamo umusaruro mbumbe ungana na toni 130,802.
Umuceri nawo ugira uruhare rukomeye mu iterambere ry’Akarere muri iki gihembwe cy’ihinga 2025A, hari hateganyijwe kuwuhinga kuri hegitari 2,160, gusa ziza kwiyongera zigera ku 2,242.1, zikaba zitezwemo umusaruro ungana na toni 11,221.
Ibishyimbo bifatwa nk’ igihingwa cy’ibanze mu miryango myinshi, uretse gufasha mu kwihaza mu biribwa, bifite akamaro mu kongera intungamubiri. Akarere ka Nyagatare kakaba kiteze kubona umusaruro wabyo ungana na toni 25,308 kuri hegitari 14,060 zahinzwe, gusa ziyongereye zivuye kuri 13,800 zateganywaga guhingwa muri rusange.
Ubuso bungana na hegitari 200 bwaje kwiyongera bukagera kuri hegitari 223 bwahinzweho soya, bikaba biteganyijwe ko hazavamo umusaruro ungana toni 335.
Mu rwego kwihaza mu biribwa by’inyamafufu hahinzwe ubuso bungana na hegitari 236 ziyongereye zivuye kuri hegitari 230 zihingwaho imyumbati kimwe mu bihingwa bitagoye guhinga; ubu buso buteganyijweho gutanga umusaruro wa toni 5,428.
Umuyobozi w’Akarere ka Nyagatare wungirije ushinzwe iterambere ry’ubukungu Matsiko Gonzague avuga ko ibyo bagezeho bigaragaza ubufatanye hagati y’Akarere n’abahinzi kandi umujyo ari uwo.
Yagize ati: “Ibyo twagezeho bigaragaza ko ubufatanye hagati ya Leta n’abaturage bushobora gutanga umusaruro. Tugomba gukomeza gushyigikira abahinzi mu buryo buhamye kugira ngo ibyo twiyemeje bigerweho.”
Muri rusange ubuso bwose bwagombaga guhingwa mu Karere ka Nyagatare mu gihembwe cy’ihinga 2025A ni hegitari 43,890, gusa byarahindutse kuko hahinzwe hegitari 45,828 hakaba hitezwemo umusaruro mbumbe ungana na toni 173,083.
