Bamwe mu baturage b’Abarundi batuye mu Karere ka Nyagatare bagaragaje icyifuzo cy’uko bashaka ubwenegihugu bw’u Rwanda, bavuga ko byabafasha kubona serivisi zitandukanye zitangwa na Leta nk’iz’ubwisungane mu kwivuza, kugira ibyangombwa by’u Rwanda no kubaho batekanye nk’Abanyarwanda.
Aba baturage bavuga ko bamaze igihe baba mu Rwanda kandi bahisemo kuhaguma kubera amahoro, umutekano n’imiyoborere myiza babonamo kandi ko nta nzara iharangwa nk’uko bavuye iwabo basuhutse.
Muri abo Abarundi harimo Kabagabego Virginia n’umugabo we Mukerandanga Jean Marie, bamaze imyaka irenga ine batuye mu Karere ka Nyagatare, Umurenge wa Matimba, Akagari ka Bwera, ahanatuye abandi bagenzi babo benshi bavuye mu Burundi.
Aba bombi bavuga ko bafashe icyemezo cyo kuva mu gihugu cyabo kubera ubukene n’umutekano muke wari uhari, bakemeza ko batifuza kongera gusubirayo ukundi.
Kabagabego Virginia yagize ati: “Twaje mu Rwanda dushaka ubuzima bwiza n’amahoro. Twabonye Igihugu gifite umutekano kandi giha agaciro abaturage. Ni yo mpamvu twifuza ubwenegihugu bw’u Rwanda.”
Umugabo we Mukerandanga Jean Marie we yemeza ko babonye ubwenegihugu byabafasha mu iterambere cyane ko babanye neza n’Abanyarwanda baje basanga, ati: “Igihe tumaze ino twabonye abavandimwe, batwakiriye neza kandi turabashimira cyane, twifuza ko twaba Abanyarwanda tukagira ibyangombwa by’u Rwanda bikadufasha mu kwiteza imbere. Naho ibyo gusubira mu Burundi byo ni nk’inzozi.”
Bakomeje bavuga ko kubona ubwenegihugu byabafasha kwishyura no gukoresha ubwisungane mu kwivuza, gufungura konti mu bigo by’imari, koroherezwa mu mikorere ya buri munsi no kugira uburenganzira busesuye nk’abandi baturage b’u Rwanda.
Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Juliet, yababwiye ko icyifuzo cyabo cyumvikana, ariko ko kubona ubwenegihugu bigomba gukorwa hakurikijwe amategeko n’amabwiriza abigenga.
Yabasobanuriye ko abasaba ubwenegihugu batari Abanyarwanda bagomba gukurikiza inzira zemewe n’amategeko, harimo gutanga ibisabwa byose no gusuzumwa hakurikijwe amategeko y’Igihugu kandi ko nibaza ku Karere bazabakira, ati: “Muzaze tuzabakira, niba mwujuje ibisabwa kandi tubona mushobotse ubwenegihugu muzabuhabwa.”
Visi Meya Murekatete yababajije niba baraje mu Rwanda nk’impunzi, ariko basubiza ko bataje nk’impunzi, ahubwo baciye ku mupaka bisanzwe kuko bari bafite ibyangombwa by’u Burundi.
Nubwo nta mibare ifatika igaragaza umubare nyawo w’Abarundi batuye mu Karere ka Nyagatare, ubuyobozi bwemeza ko bahari kandi ari benshi.
