Minisiteri y’Uburezi(MINEDUC) yatangaje ko abanyeshuri bakekwaho gukopera cyangwa gukopezwa mu bizamini bya Leta bisoza amashuri abanza mu mwaka w’amashuri wa 2025-2026, bahawe amahirwe yo kongera gukora ibizamini; mu gihe iperereza ku byabaye byo kubakopeza rigikomeje.
Mu itangazo rigenewe Abanyamakuru MINEDUC yasohoye ku mugoroba wo kuri iki Cyumweru tariki 30 Kanama 2026, ry’amakuru mashya arebana n’amakosa yo gukopera no gukopeza ibizamini bisoza amashuri abanza bya 2025/2026, yamenyesheje Abanyarwanda ko iperereza ku bikorwa byo gukopera byakekwaga mu bizamini bya Leta bisoza amashuri abanza by’umwaka wa 2025/2026 ryemeje ko habaye gukopera ku buryo bwa rusange mu byumba 254 byakorerwagamo ibizamini, harimo abanyeshuri 7,188 hirya no hino mu Gihugu.
Ni itangazo rivuga ko “Nubwo ubusanzwe uwakoze amakosa nk’aya ahanishwa gutesha agaciro ibizamini yakoze, iperereza ryagaragaje ko bimwe muri ibi bikorwa byo gukopera byateguwe cyangwa bikagirwamo uruhare n’abantu bakuru bari bafite inshingano zo gukoresha no kugenzura itangwa ry’ibizamini.
Mu rwego rwo kurengera abanyeshuri no kubungabunga ahazaza habo, Minisiteri yafashe icyemezo cyo kubaha amahirwe yo kongera gukora ibizamini bya Leta bisoza amashuri abanza. Ibyo bizamini bizasubirwamo kuva tariki 2 kugeza tariki 4 Nzeri 2026.”
Tariki 31 Kanama 2026, NESA izatangaza ingengabihe y’ibizamini, ibigo bizakorerwaho n’andi mabwiriza akenewe. Minisiteri na NESA bizakorana bya hafi n’abanyeshuri, ababyeyi, amashuri n’inzego z’ibanze kugira ngo iki gikorwa gikorwe neza mu buryo bwitondewe.
Minisiteri yongeye gushimangira ko ubuziranenge bw’ibizamini bya Leta budashobora kugibwaho impaka. Bityo, izarushaho gukaza ingamba zo kunoza imitegurire y’ibizamini, kubirinda no kugenzuza uko bikorwa, kandi ko abantu bose bazagaragaraho kuba barateguye, barafashije, baragize uruhare urwo ari rwo rwose cyangwa bararebereye nkana ibikowa byo gukopera no gukopeza bazahanwa hakurikijwe amategeko.
