Abahinzi b’umuceri bahinga mu gishanga cya Rwangingo mu Karere ka Gatsibo baravuga ko muri iki gihembwe bizeye umusaruro w’umuceri kuko nibura bateganya kubona toni zisaga 4 kuri hegitari.
Aba bahinzi bavuga ko igice cy’iki gishanga cyatunganyijwe gihigwamo umuceri gitanga umusaruro kuko wiyongereye kurusha mbere iki gishanga kitaratunganywa, bakaba bavuga ko bamaze kwiteza imbere.
Bamwe mu bahinzi baganiriye na MUHAZIYACU bavuze ko biteguye umusaruro mwinshi kuko umuceri wabo umeze neza, kuko wabonye amazi ahagije bakaba barawufashe neza.
Sibomana Emmanuel yagize ati: “Umusaruro turawiteze cyane, twagize amahirwe imvura yaguye neza nta zuba ryinshi ryabayeho kandi dufite n’amazi umuceri umeze neza rwose.”
Yakomeje agira ati: “Turashimira ubuyobozi ko butuba hafi bukaba bwaradutunganyirije igishanga, ubu nta kibazo turahinga tukeza tugatunga imiryango yacu, bitandukanye na mbere kuko wasanganga umusaruro udashimishije.”
Uwitwa Mushimiyimana Esperance nawe yagize ati: ” Kuva natangira guhinga muri iki gishanga maze kungukiramo byinshi, kuko abana banjye bariga nta kibazo maze no kugera ku iterambere, iki gihembwe twarahinze kandi umuceri wacu umeze neza twiteguye ko tuzabona umusaruro.”
Umuyobozi w’Akarere ka Gatsibo Gasana Richard yavuze ko iki gishanga cya Rwangingo gifitiye abaturage akamaro kanini.
Ati: “Umuntu agiye kuvuga ibyiza biva mu gishanga cya Rwangingo ni umusaruro, aho Rwangingo uyu munsi iri hejuru mu musaruro kandi tubona tweza toni zigeze kuri 6 ku muceri. Ibyo byose iyo ugiye kubikuba n’amafaranga ku kiro uhita ubona miliyari zijya mu baturage, gifite rero akamaro gakomeye cyane.”
Igishanga cya Rwangingo ni igishanga gifite hegitari 2000 gihingwaho umuceri, ibigori na soya, gihuriweho n’uturere twa Nyagatare na Gatsibo.
Kuri ubu buso Akarere ka Gatsibo gafiteho hegitari 322, hakaba hagiye kwifashishwa umushinga CDAT mu gutunganya hegitari 600 zidatunganyije.
