Abafatanyabikorwa bitabiriye imurikabikorwa riheruka kubera mu Karere ka Kirehe batangiye gushyira mu bikorwa bimwe mu byo basabwe birimo kunoza ibyo bakoraga neza no gushyira imbaraga mu kwamamaza serivisi batanga.
Ibi babivuze tariki 27 Gashyantare 2023 ubwo hashize iminsi mike imurikabikorwa rirangiye bamwe basubiye aho bakoreraga.
Ubwo iri murikabikorwa ryasozwaga Umuyobozi w’Akarereka Kirehe, Rangira Bruno yasabye abafatanyabikorwa kunoza serivisi bakora anabasaba gukoresha uburyo bwose kugira ngo ibyo bakora bimenyekane bityo bibahe inyungu zisumbuyeho.
Bamwe mu bafatanyabikorwa baganiriye na MUHAZIYACU bavuze ko batangiye gushyira mu bikorwa ingamba bafashe zo gutezimbere imikorere yabo.
Mukeshimana Clementine ‘Isaro service Ltd’ itunganya isabune n’amavuta bikomoka ku bimera yavuze ko kuva yakunva inama bahawe n’ubuyobozi yiyemeje kurushaho gutanga serivisi nziza ndetse akanakora byinshi bizatuma ahaza isoko rye.
Yagize ati:”Ubu nabonye isoko mu kigo cy’amashuri ndi kugerageza gukora amavuta menshi kugira ngo igihe nzaba natangiye kugemura aya mavuta atazambana make kandi mu byo twabwiwe harimo kunoza serivisi rero njyewe ubu natangiye kubyitaho mbere nabanzaga gutegereza ko umukiriya ampamagara gusa ubundi gufatanya n’abakozi dukora amavuta yo kuzahaza isoko ryacu.”
Hagenimana Evode wamuritse ibishushanyo ahagarariye ikigo cy’urubyiruko mu Karere ka Kirehe nawe yagize ati:” Nyuma y’imurikabikorwa abantu batandukanye bansabye ko nabashushanyiriza, ubu kugira ngo noze serisi mbaha ndi kubapfunyikira ibishushanyo nakoze kandi ibi sinabikoraga mbere ntaritabira imurikabikorwa.”
Girukwayo Didaces umuhuzabikorwa w’imishinga y’umuryango ‘ARCOS Network’ yita ku bidukikije nawe ati:” Ubungubu ndi kwegera abaturage nkabasangiza mu byo badusobanuriye harimo kunoza serivisi dukora kandi abaturage bari kubyumva ubu batangiye kujya kwita ku biti twateye bongeyemo imbaraga kubera imurikabikorwa.”
Imurikabikorwa nk’iri riba buri mwaka aho abafatanyabikorwa bahurira hamwe bakagaragariza rubanda rutuye Akarere ka Kirehe ibyo bakora bakanahavana impanuro z’ubuyobozi bw’Akarere ka Kirehe mu rwego rwo kuzamura iterambere.
