Ubuyobozi bw’Akarere ka Rwamagana butangaza ko muri Werurwe 2023 hatangira imirimo yo kubaka Urwibutso rwa Jenoside yakorewe Abatutsi mu 1994 rwa Mwulire ruherereye mu Murenge wa Mwulire, rukazuzura rutwaye miliyoni 900 Frw.
Urwibutso rwa Jenoside yakorewe abatutsi mu 1994 rwa Mwulire rubitse amateka yihariye mu gihe cya Jenoside, aho hiciwe abatutsi barenga ibihumbi 25 bari bahungiye kuri uyu musozi nyuma y’uko aba baturage babanje kwirwanaho bakaza kwicwa n’umutwe w’abasirikare barindaga perezida Habyarimana.
Umuyobozi w’Akarere ka Rwamagana Mbonyumuvunyi Radjab, yavuze ko uri rwibutso arirwo batoranyije kuba urwibutso rukuru muri aka Karere akaba ari nayo mpamvu rugiye kubaka mu buryo bushya rukazuzura rutwaye miliyoni 900 Frw.
ati “Urwibutso rwa Jenoside rwa Mwulire rugiye kubakwa hari harakozwe inyigo yari imaze igihe kinini, ubu yarongeye isubirwamo turimo turaganira n’abazakora imirimo yo kubaka tugiye gusinya amasezerano ,twizeye ko nyuma y’umwaka umwe tuzaza kuhibukira Urwibutso rwararangiye”
Meya Mbonyumuvunyi akomeza asobanura bimwe mubizaba bigize uru rwibutso rwa Jenoside rwa Mwurire, birimo imva ebyiri zishyinguyemo imibiri y’abazize Jenoside yakorewe abatutsi, inzu y’amateka igaragaza imwe mu mibiri y’abatutsi bishwe muri Jenoside yakorewe abatutsi mu 1994, hazaba harimo amazina, imyenda ya bamwe mu biciwe ku Musozi wa Mwurire, bimwe mu bikoresho byabo nk’ibimenyetso, sale y’inama izajya yifashishwa mu kwigisha urubyiruko amateka y’u Rwanda n’ibindi.
Muzungu Theoneste warokokeye ku musozi wa Mwulire yagize ati “tumaze kumva ko uru rwibutso rwa Jenoside rwa Mwulire rwatoranyijwe kuba urwibutso rw’Akarere kuko bashingiye ku mateka yo kwirwanaho, icya kabiri nirwo rwibutso rushyinguyemo imibiri myinshi mu karere ka Rwamagana, byaradushimishije kuba amateka ya Mwurire agiye gusigasirwa ku buryo bwisumbuye”
Abarokotse Jenoside yakorewe abatutsi mu 1994 i Mwulire bakomeza gusaba ko bamwe mu bari babayoboye mu gihe cyo kwirwanaho bazagenerwa urwibutso rwihariye abo barimo umusore witwaga Gido n’inkumi yitwaga Kirabirwa aba bakaba bafatwa nk’intwari zayoboye abandi mu kwirwanaho kugeza ubwo bishwe.
Urwibutso rwa Jenoside rwa Mwulire kugeza ubu rushyinguyemo imibiri 26,930, ni rumwe mu nzibutso 11 ziri mu karere ka Rwamagana, ariko nk’uko hariho gahunda yo kugabanya umubare w’inzibutso zigahuzwa mu huryo bwo gusigasira amateka mu karere ka Rwamagana hagomba gusigara inzibutso esheshatu harimo n’uru rwa Mwulire.
