Mu gikorwa cyo gutoranya no gutanga ibihembo ku bahize abandi binyuze mu bihangano bitandukanye byitabiriwe n’urubyiruko ruturutse mu mirenge yose igize Akarere ka Bugesera.
Kuri uyu wa Kane tariki ya 23 Nzeri, Ubuyobozi bw’Akarere ka Bugesera bwakanguriye urubyiruko kwita ku mpano rufite kandi ko bubijeje kubaherekeza mu mpano zabo zigakura zikagera kure no mu yandi marushanwa.
Ni igikorwa cyateguwe ku bufatanye bw’umushinga AJPRODHO-Jijukirwa, European Union n’Akarere ka Bugesera mu rwego rwo kwita no guteza imbere impano urubyiruko rwifitemo.
Bamwe mu rubyiruko rwaganiriye na MUHAZIYACU rwavuze ko rushimira ubuyobozi bw’Akarere kukuba babatekerejeho bakabaha umwanya wo kongera kwidagadura kandi bakanabashyigikira mu kugaragaza impano zabo.
Umwe mu batsindiye ibihembo muri iri rushanwa, Rurabo Agnes, yavuze ko ashimira ubuyobozi bw’Akarere bwabateguriye iki gikorwa cy’amarushanwa.
Avuga ko byamuteye imbaraga zo kumva ko ashoboye. Ati: “Ndishimye, kandi nshimiye n’Ubuyobozi bwabashije kudutegurira iki gikorwa, kuko byabashije kunyongerera imbaraga, biryo niyumvamo ko nshoboye cyane.”
Girimbabazi Aliette n’impanga ye Niyonizeye Aline bo mu Murenge wa Mayange, ni abana b’abangavu bitabiriye aya marushanwa.
Aba bana b’abakobwa bari mu babashije kwegukana ikihembo mu kiciro cy’abarushanwe mu kuvuga imivugo. Izi mpaga nazo zakozwe ku mutima n’inkuru y’uko hagiye kuba amarushanwa nyuma y’igihe kitari gito imikino n’imyidagaduro bidakora kubera kubahiriza ingamba zo kwirinda icyorezo cya Covid-19.
Niyonizeye Aline yagize ati: “bakoze rwose, badukoreye ibintu byiza. Muri iki gihe twumvaga ko nta rubyiruko rwahura; impano zacu zari zarasigaye ariko igikorwa bakoze ni icy’ubutwari. Buri wese yatinyutse agaragaza impano ye. Ntabwo byari byoroshye ariko twabyishimiye; ni byiza byatunejeje cyane.”
Girimbabazi Aliette nawe ati: “Muri make turabashimira kuba bemeye bakitanga bagatanga ino sitade kugirango tubashe kwerekana impano zacu. Ikindi kandi turabasaba kugirango bajye bakomeza badufashe no mu mashuri.”
Uru rubyiruko rwabwiye Muhazi Yacu kandi ko igihembo babonye bagiye kugikoresha mu kugura ibikoresho by’ishuri; harimo no kwiyishyurira ikirarane cy’amafaranga y’ishuri.
Ubuyobozi bw’Akarere ka bugesera bwijeje urubyiruko ruri kuzamura impano zitandukanye ko bazabafasha kuzamura impano zabo zikagera kure cyane cyane bibanda mu kubafasha kubona ibikoresho bibafasha mu gutunganya ibihangano byabo.
Umunyamabanga Nshingwabikorwa w’Akarere ka Bugesera, Mugiraneza David yavuze ko ku bufatanye bw’Umuryango w’Ubumwe bw’Uburayi (European Union) na AJPRODHO-Jijukirwa bazakomeza guhugura uru rubyiruko, nyuma yaho bakaba banahabwa ibikoresho bizabafasha.
Yagize ati: “Aba bose tuzabigisha bitewe n’impano umuntu afite, noneho nyuma yo kubigisha nubundi tuzabaha ibikoresho bibafasha, kugirango izo mpano bafite zegusubira inyuma.”
Uyu muyoyobozi yashimangiye ko kwigisha uru rubyiruko ariko utabahaye ibikoresho ko ntacyo waba ubafashije cyane.
Ati: “Ubigishije gusa, ariko utabahaye ibibafasha kugira ngo bakomeza batere imbere mu mpano zabo, nta kintu byaba bibafashije cyane.”
Mugiraneza kandi arahumuriza urubyiruko rutabashije gutsindira ibihembo ndetse n’urutabashije kwitabira aya marushanwa ko Akarere ndetse n’igihugu muri rusange batekereza ku rubyiruko, bityo ko no mu bihe biri imbere hari andi marushanwa atandukanye agamije gushyigikira impano z’urubiruko.
Abagera kuri 150 nibo bitabiriye aya marushanwa nyuma y’uko batoranyijwe mu majonjora yabereye mu mirenge 15 igize Akarere ka Bugesera. Ku bufatanye bw’Akarere, Umuryango w’Ubumwe bw’Uburayi (European Union) na AJPRODHO-Jijukirwa harateganywa abagera kuri 400 bazafashwa kuzamura impano zabo.
