Nshimiyimana Musa utuye mu Murenge wa Rwimiyaga, Akagari ka Rwimiyaga, Umudugudu wa Byimana ahamya ko ibiyobyabwenge byamugizeho ingaruka kuko kuva yatangira kubinywa nta kintu kiza yabibonyemo uretse gufungwa n’ibindi bibazo byo kunywa kanyanga, urumogi n’izindi nzoga zitemewe.
Nshimiyimana Musa kuri ubu ufite imyaka 33, aganira na MUHAZIYACU yasobanuye uburyo yatangiye kunywa inzoga nka Kanyanga n’urumogi afite imyaka cumi n’itatu.
Yagize ati: “Natangiye kunywa inzoga mfite imyaka cumi n’itatu, nanywaga kanyanga n’urumogi ku rwego rwo hejuru maze bigatuma numva mfite imbaraga zidasanzwe numva ko nta muntu wankoraho kubera ibiyobyabwenge.”
Yakomeje agira ati: “Iyo nabaga nanyweye ibi biyobyabwenge byatumaga nkora ibintu bitagakozwe n’umuntu muzima, nk’ubu abaturage barabizi ko nari umujura kandi byose nabiterwaga no kunywa ibiyobyabwenge, uretse kuba nari umujura, ni njye muntu warwanaga cyane n’abandi.”
Yongeye ati: “Ibiyobyabwenge byatumye ntandukana n’umugore wanjye, mu busanzwe mfite umugore n’umwana ariko ubu ntitukibana kubera ko ntari nshobotse kubera kubatwa n’ibiyobyabwenge.”
Nshimiyimana Musa avuga ko yafunzwe inshuro nyinshi azira ubujura n’ urugomo yaterwaga no gukoresha ibiyobyabwenge, ati: “Ibiyobyabwenge byatumye ntarangiza amashuri, ubu abo twiganye babaye abantu bakomeye ariko njyewe kubera ingaruka z’ibiyobyabwenge nta kintu na kimwe nigejejeho uretse gufungwa gusa, nagiraga urugomo ndetse nari n’umujura kubera ibyo byose nafunzwe inshuro nyinshi ndetse nafungiwe n’Iwawa nzira gukoresha ibiyobyabwenge.”
Nshimiyimana Musa avuga ko ashimira Ubuyobozi bw’Igihugu bwabonye ko Abanyarwanda bagiye kumarwa n’ibiyobyabwenge bugafata ingamba zo kubica.
Yagize ati: “Ndashimira ubuyobozi bw’Igihugu cyacu bwo bwarebye bukabona ko ibiyobyabwenge bigiye kwica Abanyarwanda bityo bugafata ingamba zo kubica no kubirwanya kugira ngo Abanyarwanda bakomeze kugira ubuzima bwiza buzira ibiyobyabwenge.”
Akomeza ashishikariza Abanyarwanda kumvira inama bahabwa bagafatanya n’ubuyobozi gushyira mu bikorwa ingamba zo guca no kurwanya inzoga zitujuje ubuziranenge n’ibiyobyabwenge muri rusange kuko nk’umuntu wakoreshaga ibiyobyabwenge avuga ko mu myaka yose ntacyo byamugejejeho.
Yagize ati: “Icyo nasaba Abanyarwanda nugufatanya n’ubuyobozi mu ngamba zo guca no kurwanya inzoga zitujuje ubuziranenge n’ibiyobyabwenge kuko byangiriza ubuzima, gutangira amakuru ku gihe igihe cyose babonye ukoresha ibiyobyabwenge n’ushaka kubikwirakwiza mu Banyarwanda.”
Ubwo Minisitiri w’Ubutegetsi bw’Igihugu, Habimana Dominique aherutse kwifatanya n’abaturage ba Rwimiyaga mu muganda rusange usoza ukwezi kwa Kanama 2026, yibukije abaturage i Nyagatare ko uruhare rwabo rukenewe mu kurwanya inzoga zitujuje ubuziranenge n’ibiyobyabwenge kuko Leta yo itazigera ihwema kubirwanya.
Yagize ati: “Abaturage turabibutsa ko uruhare rwabo rukenewe muri uru rugamba turimo rwo kurwanya inzoga zitujuje ubuziranenge n’ibiyobyabwenge muri rusange, Leta ntabwo izigera ihwema kubirwanya rero namwe mukwiye kugaragaza ubufatanye kugira ngo bicike burundu.”
