Umusore w’imyaka 27 wo mu Mudugudu wa Gasogororo, Akagari ka Kayonza, Umurenge wa Mukarange mu Karere ka Kayonza, yatawe muri yombi akekwaho kwica umugore w’imyaka 25 wari usanzwe wigurisha, nyuma yo kumunigira mu nzu yari acumbitsemo.
Ibi byabaye mu rukerera rwo kuri uyu wa Kane, tariki ya 30 Nyakanga 2026, mu Mudugudu wa Gasogororo, Akagari ka Kayonza, Umurenge wa Mukarange.
Amakuru avuga ko uyu musore yari yageze mu Karere ka Kayonza avuye mu Karere ka Nyamagabe, aje gusura mukuru we. Ku mugoroba wo ku wa Gatatu, bivugwa ko yari ari kumwe n’uwo mugore basangira inzoga mbere yo gutahana.
Umuvugizi wa Polisi y’u Rwanda mu Ntara y’Iburasirazuba, SSP Twizeyimana Hamdun, yemeje ko uwo musore yamaze gutabwa muri yombi, nyuma yo gusangwa mu nzu nyakwigendera yari arimo.
Yasobanuye ko ahagana saa cyenda z’ijoro, umwe mu baturage yahamagaye Polisi nyuma yo kubwirwa n’umuturanyi ko yumvise umuntu ataka. Uwo muturanyi ngo yarungurutse mu idirishya abona uwo musore ari kuniga uwo mugore.
Nyuma yo kubona ibyo, uwo muturage yahise akinga urugi rw’inzu ayishyiraho agakondo kugira ngo ukekwaho icyaha adatoroka, anahita ahamagara Polisi.
SSP Twizeyimana yavuze ko Polisi igeze aho byabereye, yasabye guca ingufuri zari zifunze urugi rw’inyuma n’urw’imbere, isangamo uwo musore ndetse n’umurambo w’uwo mugore.
Uwo musore yahise atabwa muri yombi kugira ngo akorweho iperereza, mu gihe umurambo wa nyakwigendera wajyanywe mu Bitaro bya Gahini gukorerwa isuzuma rizafasha kumenya icyateye urupfu rwe.
Polisi yavuze ko iperereza rikomeje kugira ngo hamenyekane icyihishe inyuma y’uru rupfu.
