Ingabo z’u Rwanda (RDF) zinjije ku mugaragaro icyiciro gishya cy’urubyiruko rw’abahungu n’abakobwa binjiye mu ngabo nyuma yo kurangiza neza amahugurwa y’ibanze ya gisirikare yamaze amezi atandatu, yabereye mu Kigo cy’Amahugurwa ya Gisirikare giherereye i Nasho mu Karere ka Kirehe.
Umuhango wo gusoza ayo mahugurwa wayobowe n’Umugaba Mukuru w’Ingabo z’u Rwanda, General Mubarakh Muganga, witabiriwe n’abajenerali ba RDF, Ba Ofisiye bakuru n’abato n’abandi basirikare ku zindi nzego.
Mu rwego rwo kugaragaza ubumenyi bungukiye mu mahugurwa, abasirikare bashya berekanye ubushobozi mu bikorwa bitandukanye bya gisirikare, birimo gukoresha intwaro no kurasa ku ntego ndetse n’imyitozo itandukanye ibategurira kuzuza inshingano zabo.
Muri uwo muhango, bagaragaje ko biteguye gukoresha ubumenyi n’ubushobozi bungutse mu gukorera no kurinda Igihugu, bubahiriza inshingano n’indangagaciro bya RDF.
General Mubarakh Muganga yashimiye abo basirikare ku kwihangana, ubwitange n’umurava bagaragaje mu gihe cyose cy’amahugurwa. Yabakiriye mu muryango mugari wa RDF, anabashishikariza gukoresha ubumenyi bungutse mu kurinda ubusugire bw’u Rwanda no kurinda umutekano w’abarutuye.
Yabibukije inama zatanzwe na Perezida wa Repubulika akaba n’Umugaba w’Ikirenga w’Ingabo z’u Rwanda, ku rubyiruko rwitabiriye gahunda y’Indangamirwa yabereye mu Kigo cy’Amahugurwa cya Gabiro giherereye mu Karere ka Gatsibo.
Gen Mubarakh yabasabye gukomeza guharanira kubungabunga ururimi rw’Ikinyarwanda, umuco Nyarwanda, imigenzo, amahame n’indangagaciro by’u Rwanda, no guhora biteguye guhangana n’icyahungabanya umutekano w’Igihugu.
Aba basirikare bakanguriwe kwirinda ubunebwe, amacakubiri, imvugo zibiba urwango cyangwa zishyigikira ayo macakubiri, ndetse n’imyitwarire mibi irimo ubusinzi n’ubusambanyi.
General Mubarakh yabibukije ko amahugurwa barangije ari intangiriro y’urugendo rwabo rwa gisirikare, ashimangira ko bazakomeza guhabwa andi mahugurwa agamije kongera ubumenyi n’ubushobozi bwabo hakurikijwe uko inshingano za RDF zigenda zihinduka.
Ikindi basabwe gushyira mu bikorwa ibyose bize, kubahiriza icyerekezo n’inshingano za RDF, no kugira uruhare mu kubaka ingabo z’umwuga, zifite ubushobozi kandi zirangwa n’imyitwarire myiza.
Umugaba Mukuru w’Ingabo z’u Rwanda yashimiye kandi ubuyobozi bw’Ikigo cy’Amahugurwa ya Gisirikare cya Nasho, by’umwihariko abarimu, kubera ubwitange n’umuhate bagaragaje mu gutoza no guha ubumenyi abo basirikare bashya bikabategurira gutanga umusanzu unoze mu kurinda no kurengera u Rwanda.
